Propozim-ligji për arsimin e lartë po përcillet me shumë kritika ndërsa vijon debati publik për të njëjtin, pas së cilit pritet të miratohet versioni përfundimtar.
Profesori I UT- së Arianit Reka konsideron se draft-ligji ka tendencë serioze të kufizojë veshjen mbi bazë bindjeje/besimi, duke lënë formulime të paqarta që mund të keqpërdoren.”Një ligj për arsimin e lartë nuk duhet të hapë derën e diskriminimit, por ta mbyllë atë”- thotë Reka ndërsa potencon se ky nuk është ligj reformues,por arrogancë dhe padrejtësi e paketuar si ligj!
Shqetësime serioze për propozimligjin për arsim të lartë kanë shprehur mbi 200 profesorë të UT-së, UNT-së dhe UEJL-së. Paralajmërojnë se disa nga zgjidhjet e propozuara rrezikojnë të cenojnë autonominë universitare, përmes krijimit të “Këshillit Universitar” me kompetenca të zgjeruara dhe me përfshirje të anëtarëve të emëruar nga Qeveria. Sipas profesorëve, shqetësuese janë edhe kriteret e reja për zgjedhje në thirrjet akademike, veçanërisht kërkesa për publikime në revista të indeksuara ndërkombëtare dhe theksimi i H-index-it, që mund të vështirësojnë avancimin në disa fusha shkencore. Ata kundërshtojnë gjithashtu kufizimin e të drejtës për organizimin e studimeve të doktoraturës vetëm për katër universitetet e para të ranguara, duke e cilësuar këtë si masë që krijon pabarazi.
Profesorët bëjnë thirrje për rishikim të dispozitave të kontestuara dhe për një debat të gjerë e transparent me komunitetin akademik para miratimit përfundimtar të ligjit.
