Lidhja e Sindikatave të Maqedonisë (LSM) sot ka publikuar planin rreth bllokimit të deputetëve të Kuvendi të Maqedonisë së Veriut, si një formë e protestës rreth kërkesave sindikale, transmeton Portalb.mk.
“Në bazë të Vendimit të kryesisë së LSM-së dhe Këshillit të LSM-së, dhe na bazë të Ligjit për tubime publike, Lidhja e Sindikatave të Maqedonisë (LSM) organizon protestë me bllokadë më 10 shkurt (e martë), e cila do të mbahet para Kuvendit të RMV-së me fillim në ora 09:00”, raportoi LSM-ja.
Në njoftim theksohet se do të bllokohet rruga “11 Tetori” dhe “Dame Gruev”, ndërsa deputetët do të bllokohen pasi për një vit kanë heshtur ndaj kërkesës së LSM-së për rritjen e rrogës minimale në 600 euro dhe rritjen e çdo rroge tjetër për 100 euro. Ata e vlerësojnë të turpshme tentimin për rritjen e rrogës së deputetëve për 250 euro, kurse për punëtorët as 25 euro.
Kujtojmë se LSM më 4 shkurt paraqiti një iniciativë në Kuvendin e RMV-së dhe te grupet parlamentare për të ulur pagat e funksionarëve me 80 përqind. Aty thuhet se neni 11 i Ligjit për pagat dhe kompensimet e tjera të zyrtarëve ndryshohet dhe shton se baza për llogaritjen duhet të jetë paga minimale, sipas të dhënave nga Enti Shtetëror i Statistikave. Ata shtojnë gjithashtu se koeficientët për përcaktimin e kompensimit të pagave të anëtarëve të parlamentit në Kuvendin e Republikës së Maqedonisë dhe personave të tjerë të zgjedhur dhe të emëruar të ulen me 40 përqind.
Në rrjetet sociale, Kryetari i LSM-së, Slobodan Trendafilov, më 3 shkurt paralajmëroi se më 10 shkurt, kur është caktuar një seancë në Kuvendin e Maqedonisë së Veriut, deputetët do të bllokohen; më 12 shkurt, siç njoftoi Trendafilov, do të vijë bllokimi i dytë para Odës së Tregtisë, Lidhjen e Odave të Tregtisë dhe Organizatës së Punëdhënësve, ndërsa më 17 shkurt është planifikuar bllokimi i Qeverisë.
