Presidentja Gordana Siljanovska-Davkova sot, duke folur në aktivitetin qendror me rastin e Ilindenit në Krushevë, tha se është koha për një pranverë të re republikane. Sipas saj, është koha për të zhdukur barërat e këqija të korrupsionit dhe krimit në vend. Ajo shtoi gjithashtu se Republika ekziston për të mirën e përbashkët, për hir të të gjithë qytetarëve, pavarësisht nga përkatësia e tyre, për të na mundësuar të përparojmë bazuar në njohuri, aftësi dhe përpjekje, dhe jo në bazë të privilegjeve dhe lidhjeve të statusit, transmeton Portalb.mk.
“Është koha për një pranverë të re për republikën tonë maqedonase, për kthim në rrënjët e saj republikane. Çfarë do të thotë kjo? Qytetarët maqedonas presin të paktën dy gjëra nga republika e tyre – liri dhe drejtësi. Kur flas për liri, nuk nënkuptoj vetëm liri politike, por edhe ekonomike, akademike, kulturore, sociale… Kur flas për drejtësi, nuk nënkuptoj vetëm gjyqësorin, por edhe drejtësinë sociale, ekologjike dhe gjenerative. Nuk duhet të harrojmë se parakushtet për liri dhe drejtësi janë sundimi i ligjit dhe barazia para ligjit”, tha Siljanovska-Davkova.
Duke iu referuar zjarreve që kanë përfshirë vendin në periudhën e kaluar, presidentja tha gjithashtu se për më pak zjarre në pyje, nevojitet jo vetëm një sistem ligjor, por edhe një sistem efikas institucional, krijimi i të cilit është aktualisht në proces.
Për të, nuk ka dyshim se nevojiten reforma të thella dhe thelbësore në çdo fushë sipas standardeve evropiane, por ajo gjithashtu theksoi se një pyetje legjitime është nëse dhe në çfarë mase Bashkimi Evropian i sotëm, pra përfaqësuesit e tij më të lartë, janë në përputhje me idealet e krijuesve dhe themeluesve të tij.
Presidentja tha gjithashtu se korrupsioni dhe krimi i organizuar endemik, institucionet e dobëta, partitë e forta dhe individët e fuqishëm kanë kontribuar në eksodin e popullsisë.
“Të rinjtë më premtues, maqedonas, shqiptarë, turq, serbë, romë, vllehë, boshnjakë dhe të tjerë, kanë emigruar masivisht në kërkim të një vendi të mirë për të jetuar. Midis tyre, për shkak të ndarjes sonë artificiale nga BE-ja, për arsye ekonomike, ka edhe bashkëqytetarë tanë që po synojnë shtetësinë e fqinjëve tanë, anëtarë të Bashkimit Evropian, gjë që zgjon orekset nacionaliste ndaj nesh”, shtoi ajo.
Maqedonia sot feston 122-vjetorin e Kryengritjes së Ilindenit dhe Republikës së Krushevës dhe 81-vjetorin e Sesionit të Parë të KAÇKM-së.
Ndryshe, Maqedonia e Veriut po pret lëvizje nga Bullgaria mbi propozimin për të hartuar një rezolutë të përbashkët që do të konfirmonte veçantinë e identitetit dhe gjuhës maqedonase në Parlamentin Evropian.
Maqedonia e Veriut mbetet e ngujuar në rrugëtimin drejt BE-së, shkaku i kontestit me Bullgarinë fqinje. RMV duhet t’i bëjë ndryshimet kushtetuese për të vazhduar rrugën drejt BE-së. Ndryshimi kushtetutës përfshin shtimin e bullgarëve dhe etnive tjera në Kushtetutë. Ndryshimi kërkon shumicë prej dy të tretash dhe negociatat me BE-në nuk do të fillojnë derisa të bëhen këto ndryshime.
Kujtojmë se me kusht të ndryshimi të Kushtetutës, Maqedonia e Veriut më 19 korrik të vitit 2022 i filloi bisedimet qasëse me BE-në me mbajtjen e konferencës së parë ndërqeveritare, pas miratimit të propozimit francez të cilin Maqedonia e Veriut e miratoi më 16 korrik 2022. Propozimi atë kohë u votua në parlament pa pjesëmarrjen e opozitës së atëhershme e cila tani është në pushtet.
