Rritja e numrit të qytetarëve të Maqedonisë së Veriut, që raportojnë se ndodhen në zonat e rrezikuara në Lindjen e Mesme ka vënë në lëvizje institucionet shtetërore, përderisa situata e sigurisë në rajon mbetet e tensionuar. Qytetarët e Maqedonisë së Veriut që ndodhen në Dubai thonë se situata për momentin është e qëndrueshme dhe se janë në kontakt me autoritetet tona. Megjithatë shmangin lëvizjen pa nevojë.
”Për momenti situata është e sigurt dhe jemi gjithë kohen në kontakt me autoritetet, gjithçka funksionon në rregull, nuk ka ndërpritje të transportit publik hotelet janë të hapura, ato gastronomike, restorantet, maketet, funksionojnë në mënyrë të rregullt.”Çdo gjë është normale vetëm se nuk ka shumë lëvizje për shkak e shmangin daljen pa nevojë.”Shumica, qoftë të vendit apo turistë dalin vetëm nëse kanë nevojë por nuk është si ditët tjera”, u shpreh Taxhudin Useini – Gastronom në Dubai.
Ministria e Punëve të Jashtme e vendit ka njoftuar se ka aktivizuar një shtab krizë, i cili funksionon 24 orë dhe ka për detyrë të ndjekë zhvillimet në terren, si dhe të koordinojë të gjitha aktivitetet për mbështetjen e qytetarëve që mund të kenë nevojë për ndihmë. Deri tani, nga Ministria e Punëve të jashtme nuk ka ndonjë numër të saktë të shtetasve tanë që ndodhen në zonat e konfliktit.
“Në varësi të zhvillimeve, po shqyrtohen edhe mundësitë për masa shtesë, përfshirë asistencë të organizuar apo evakuim të sigurt. Ambasadat në rajon mbeten në komunikim të rregullt me qytetarët dhe janë të gatshme të ofrojnë mbështetje konsullore”, than nga Ministria e Punëve të Jashtme.
Nga Ministria e Punëve te Jashtme u bëjnë thirrje shtetasve të Maqedonisë së Veriut që ndodhen në zonat e konfliktit, të ndjekin me kujdes udhëzimet e autoriteteve lokale dhe të qëndrojnë në kontakt me institucionet përkatëse. Për informacione dhe asistencë, qytetarët mund të drejtohen në linjat zyrtare të emergjencës dhe në përfaqësitë diplomatike.
