Qeveria e Maqedonisë së Veriut sot në mesditë do të mbajë një seancë në të cilën pritet të miratojë masa të jashtëzakonshme për zbutjen e rritjes së çmimeve të karburanteve, pas valës së re të shtrenjtimit që ka përfshirë edhe tregun vendas.
Nga Qeveria informojnë se rritja e çmimeve në bursat botërore të naftës tashmë po reflektohet edhe në vend, ndërsa pritet shtrenjtim shtesë i naftës dhe benzinave që nga fillimi i javës.
“ Çmimet në bursat botërore të naftës po rriten, gjë që pritet të reflektohet edhe më tej në çmimet vendore të karburanteve. Edhe pse në pikat e karburanteve në vend ka çmime dukshëm më të lira krahasuar me rajonin, pritet që të hënën të ketë rritje shtesë të çmimeve të naftës dhe benzinave. Për këtë arsye, Qeveria nesër në orën 12:00 do të mbajë seancë ku do të miratohen masa të jashtëzakonshme për përballimin e çmimeve të larta të benzinave, me qëllim zbutjen e goditjes së çmimeve”, bënë të ditur burime nga Qeveria.
Ndërkohë, një pjesë e pompave të benzinës tashmë ofrojnë çmime më të ulëta. Që nga 18 marsi, në pikat e OKTA, Makpetrol dhe Lukoil, karburantet shiten për dy denarë më lirë se çmimi maksimal i përcaktuar nga Komisioni Rregullator për Energji.
Ky ulje çmimesh vjen pasi OKTA u ofroi çmime më të ulëta distributorëve, me qëllim që ata ta reflektojnë diferencën edhe tek konsumatorët finalë.
Më herët, ministrja e Energjetikës Sanja Bozhinovska paralajmëroi se kjo masë do të vlejë deri në fund të marsit, ndërsa drejtori i kompanisë, Dimitrios Pashos, theksoi se çmimet përfundimtare varen gjithsesi nga kushtet e tregut dhe politikat e tregtarëve.
Ndryshe, sipas vendimeve të fundit të Komisionit Rregullator për Energji, nafta u shtrenjtua për 21 denarë për litër, ndërsa benzinat për 12 denarë, gjë që shkaktoi reagime tek qytetarët.
Si arsye kryesore për këto shtrenjtimë përmenden zhvillimet në Lindjen e Mesme dhe paqëndrueshmëria në tregjet globale të energjisë
