Shërbimi postar danez do të dorëzojë letrën e fundit më 30 dhjetor, duke i dhënë fund një tradite mbi 400-vjeçare të shpërndarjes së letrave në Danimarkë. Vendimi u mor nga PostNord, kompania e krijuar në vitin 2009 pas bashkimit të shërbimeve postare të Danimarkës dhe Suedisë, e cila e justifikon këtë hap me digjitalizimin e lartë të shoqërisë daneze dhe rënien drastike të kërkesës për letra.
Sipas PostNord, dërgimi i letrave ka rënë me mbi 90% në 25 vitet e fundit, ndërsa blerjet online dhe dërgesat e pakove janë rritur ndjeshëm, shkruan A2 CNN. Si pasojë, kompania do të shkurtojë rreth 1500 vende pune dhe do të heqë nga përdorimi 1500 kuti postare të kuqe, shumë prej të cilave janë shitur si objekte simbolike.
Megjithatë, dërgimi i letrave nuk do të zhduket plotësisht. Kompania private Dao do ta marrë përsipër këtë shërbim, duke e zgjeruar ndjeshëm aktivitetin e saj nga janari. Sipas ligjit danez, mundësia për të dërguar letra duhet të ekzistojë gjithmonë.
Ndërkohë, studiuesit vërejnë një rikthim simbolik të letrës së shkruar me dorë, sidomos tek të rinjtë, të cilët e shohin atë si një kundërpeshë ndaj mbingopjes digjitale. Edhe pse ndryshimi konsiderohet kryesisht sentimental, ai shënon një moment historik për një nga shoqëritë më të digjitalizuara në botë.
