Në kuadër të një bashkëpunimi të frytshëm mes institucioneve shëndetësore dhe akademike, Shtëpia e Shëndetit – Shkup ka dhuruar një autoambulancë për Fakultetin e Mjekësisë pranë Universitetit Ndërkombëtar Ballkanik.
Autoambulanca, e cila nuk është më në gjendje për operime në terren, do të shërbejë për qëllime praktike dhe edukative, duke u mundësuar studentëve të përvetësojnë njohuri konkrete mbi pajisjet dhe funksionimin e një njësie të urgjencës mjekësore.
Drejtori i Shtëpisë së Shëndetit – Shkup, Samir Iseni, përmes një postimi në Facebook ka theksuar rëndësinë e këtij kontributi në rritjen e cilësisë së arsimit mjekësor dhe përgatitjen e profesionistëve të ardhshëm të shëndetësisë. “Ky bashkëpunim reflekton përkushtimin tonë për të mbështetur arsimin dhe për të investuar në gjeneratat e reja që do t’i shërbejnë komunitetit me përkushtim dhe profesionalizëm”, shkruan Iseni.
Universiteti Ndërkombëtar Ballkanik dhe Shtëpia e Shëndetit – Shkup riafirmuan përkushtimin për bashkëpunime të mëtejshme që ndihmojnë në zhvillimin e kapaciteteve praktike të studentëve dhe forcimin e lidhjes mes teorisë dhe praktikës në fushën e mjekësisë.
