Mbrëmjen e së mërkurës, në Turqi ka shkëlqyer ylli shqiptar, Berat Lush i cili ka realizuar 4 gola në fitoren e thellë 5-0 që skuadra e tij Erokspor mori ndaj Istanbulsporit. Kjo paraqitje e futbollistit nga Gostivari, ka marrë jo pak vëmendje nga mediat turke, duke e cilësuar si yllin më të ri të futbollit turk, i cili po lë gjurmë në moshë shumë të re.
“Panorama Sport” ka mësuar se FSHF nuk ka humbur shumë kohë dhe menjëherë ka nisur kontaktet me familjarët e futbollistit, për ta bindur që të zgjedhë fanellën e Shqipërisë.
Vetë Alban Bushi i cili drejton Shqipërinë U21, ditën e djeshme ka nisur bisedimet me babanë e Berat Lushit, në mënyrë që ky i fundit të vishet kuqezi në të ardhmen, duke shtuar padyshim vlerat në sulmin e skuadrës sonë.
BERAT LUSH- Sulmuesi shqiptar i lindur në Stamboll dhe me origjinë nga Gostivari, është bërë kryefjalë në Turqi, falë paraqitjes në ndeshjen e fundit ndaj Istanbulsporit, ku arriti të shënonte edhe 4 gola në fitoren e thellë 5-0. Sulmuesi 18-vjeçar ka marrë vëmendjen e mediave turke të cilat e vlerësojnë si një lojtar me shumë potencial, dhe këtë e tregojnë shifrat, 5 gola në 7 javët e para të kampionatit turk, aq sa ka edhe Taulant Seferi që luan në të njëjtën ligë me të.
Berat Lush luan si sulmues i majtë dhe është një nga pozicionet ku Shqipëria po vuan për lojtarë dhe mjafton të shihet se në shumë ndeshje, Silvinjo ka improvizuar me Nedim Bajramin, i cili në Skoci po kalon një moment negativ, pa minuta dhe pa besim nga klubi. Nëse Lushi nuk është ende mjaftueshëm i mirë për Shqipërinë A, U21 do të kishte ndoshta sulmuesin që po i mungon prej kohësh pasi është vetëm 18 vjeç dhe do të ishte në moshën ideale për të luajtur edhe në Europianin e 2027.
TURQIA- Deri më tani, Lushi është aktivizuar me të rinjtë e Turqisë, megjithatë vetë futbollisti nuk e ka mohuar kurrë origjinën e tij. Në profilin e tij në “Instagram”, Lush mban flamurin turk dhe atë shqiptar, ndërkohë që shumë herë postimet e tij në rrjetet sociale, janë shoqëruar me këngë në gjuhën shqipe, duke treguar se e di shumë mirë prejardhjen që ka.
Sikur të mos mjaftonin këto, futbollisti e festoi një nga golat e shënuar me shqiponjë, duke dhënë një mesazh të fortë. Kartonin e Berat Lush e zotëron Gallatasaraj që e ka huazuar këtë sezon në ligën e dytë turke për të marrë minuta, gjë të cilën 18-vjeçari po e bën në mënyrën më të mirë të mundshme.
SULEJMAN LUSH- Ashtu si Berati, edhe vëllai i tij Sulejman Lush aktivizohet në kampionatin turk me skuadrën e Ankara Keçiorenguçu, skuadër te e cila po bën mjaft mirë. Së bashku me të, te skuadra e kryeqytetit aktivizohen edhe dy futbollistët e tjerë shqiptarë, Eduart Rroca dhe Odise Roshi. Mbrojtësi 24-vjeçar, gjithashtu ka luajtur me moshat e Turqisë, teksa nga skuadra e parë ende nuk është thirrur./PANORAMASPORT/
