Ministri i Ekonomisë dhe Punës Besar Durmishi nga VLEN, ka reaguar fuqishëm pas shpalljes zyrtare të zgjedhjeve lokale, duke bërë një rikapitulim të zhvillimeve politike të 15 muajve të fundit dhe duke goditur drejtpërdrejt kundërshtarët politikë.
“Nuk bëhemi bashkë, u bëmë. Nuk fitojmë, fituam me 107 mijë vota të pastra shqiptare dhe i nxorëm jashtë Qeverisë. Do dalin në janar, dolën vetë nga loja, duke hyrë në lista të zeza. Nuk mbërrijnë deri në lokale, sot kemi kandidatët tanë, secili më i mirë se tjetri”, shkroi Durmishi në rrjetet sociale.
Ai theksoi se VLEN është rritur dhe forcuar nga ideali, ndërsa kundërshtarët po përçahen në çdo degë e nëndegë.
Duke iu referuar rebrendimit të “Frontit Evropian” në “Aleanca Kombëtare për Integrim”, ministri e quajti këtë një mashtrim me emër të ri, duke shtuar se “Mjafton të shihni “safin” e parë të tyre dhe gjithçka bëhet e qartë”.
Durmishi nuk kurseu as “analistin” Baton Haxhiu, duke aluduar në kolumnën e tij të fundit, ku ai pranon se Ali Ahmeti është “përgjëruar” për të hyrë në Qeveri.
Sipas Durmishit, kjo është arsyeja pse “Tetori do të flasë qartë e zëshëm: Mjaft më me BDI dhe patericat e saj!”.
