Shqipëria dhe Kosova janë zyrtarisht në vazon 3 të play-off-it të Kupës së Botës 2026, pasi e mbyllën fazën kualifikuese në vend të dytë në grupet e tyre. Kjo do të thotë se dy kombëtaret shqiptare nuk mund të përballen me njëra-tjetrën në gjysmëfinale, ndërsa ndeshjet e tyre do t’i luajnë në transfertë.
Rivalët potencialë aktualë për Shqipërinë dhe Kosovën janë Skocia, Çekia, Sllovakia dhe Uellsi, ndërkohë që renditja e ardhshme e FIFA-s mund të ndryshojë vetëm pozicionin e Irlandës, e cila mund të shkëmbejë vendet e vazo-s me Uellsin.
FIFA pritet të publikojë renditjen zyrtare më 19 nëntor, ndërsa një ditë më vonë, më 20 nëntor në Nyon, duke nisur nga ora 13:00, do të hidhet edhe shorti i gjysmëfinaleve të play-off-it, të cilat do zhvillohen më 26 mars 2026.
Si funksionon play-off-i?
16 skuadra (12 nga kualifikueset + 4 nga Liga e Kombeve) ndahen në katër vazo sipas renditjes FIFA. Ekipet e vazo-s 1 përballen me vazon 4, ndërsa ato të vazo-s 2 përballen me vazon 3. Ndeshjet janë me një takim të vetëm dhe ekipet me koeficient më të lartë luajnë në shtëpi.
Fituesit e gjysmëfinaleve shkojnë më pas në finalet e play-off-it, më 31 mars 2026, ku shorti përcakton jo vetëm çiftet, por edhe fushën pritëse.
Në skenarin më të mirë, Shqipëria do të ketë dy ndeshje në play-off; në më të keqin, mund të mbyllë garën pas takimit gjysmëfinal.
Ndarja aktuale e vazove:
Vazo 1: Itali, Turqi, Poloni, Ukrainë
Vazo 2: Skoci, Çeki, Sllovaki, Uells
Vazo 3: Irlandë, Bosnjë-Hercegovinë, Shqipëri, Kosovë
Vazo 4: Maqedonia e Veriut, Rumani, Suedi, Irlanda e Veriut
