Shkëndija e mbylli me stil aventurën evropiane në shtëpi, duke marrë një fitore të madhe 2-0 ndaj Slovan Bratislavës në “Todor Proeski”, fitore që i mban gjallë shpresat për kualifikim në play-off të Ligës së Konferencës.
Skuadra tetovare nuk shkëlqeu estetikisht, por luajti me disiplinë të hekurt, organizim dhe taktikë të zgjuar, duke shfrytëzuar gabimet e shumta të mysafirëve dhe duke mos u lënë atyre asnjë mundësi serioze shënimi gjatë gjithë ndeshjes. Për më tepër, Shkëndija mund të kishte fituar edhe me rezultat më të thellë, pasi krijoi edhe dy raste të pastra në minutat e fundit.
Ndeshja
Fillimi i lojës ishte i qetë, me të dy skuadrat që kërkonin ritmin. Shkëndija arriti ta zhbllokojë rezultatin në minutën e 33-të, kur pas një goditjeje këndi, Bajriq devijoi topin në rrjetën e vet, duke i dhënë epërsinë vendasve.
Pak para fundit të pjesës së parë, në minutën 45+1, Spahiu dyfishoi shifrat pas një kundërsulmi të shpejtë dhe asistimi perfekt të Webster.
Në pjesën e dytë pritej reagimi i Slovanit, por ekipi i Jeton Beqirit mbrojti me përpikëri dhe siguri. Gosti nuk arritën të krijojnë rrezik real, ndërsa Shkëndija kërcënonte nga kundërsulmet. Zhejnullai humbi një rast ideal në minutën e 79-të, duke gjuajtur dobët përballë portierit Takacs. Në minutën e 88-të, Ademi goditi traversën, duke ia mohuar ekipit të tij golin e tretë.
Mundësia më e mirë e Slovan Bratislavës erdhi thellë në kohën shtesë, kur Marcely gjuajti fuqishëm nga distanca, por goditi vetëm traversën e portës së Gaje.
Rezultati final
Shkëndija – Slovan Bratislava 2-0 (2-0)
Stadiumi: “Todor Proeski”, Shkup
Shikues: rreth 2,000
Gjyqtari: Ivar Kristiançon (Islandë)
Golashënues:
Bajriq (autogol) 33’
Spahiu 45’+1
Formacionet
Shkëndija: Gaje, Trumçi, Fetai, Cakë, Webster, Zhejnullai (Meliqi 90’), R. Ramadani, Çaka (Krasniqi 72’), Spahiu (F. Ramadani 85’), Latifi (Mazari 85’), Ibraimi (Ademi 72’).
Slovan Bratislava: Takacs, Bajriq, Kashia (Barsegjan 72’), Wimmer, Blackman, Ibrahim (Jirayank 58’), Pokorny (Gajdos 58’), Sandro Cruz (Mustafiq 86’), Marcely, Mak (Savvidis 86’), Weiss.
