Komisioni i Disiplinës pranë FFM-së ka vendosur që Shkëndija e Haraçinës të zhvillojë katër ndeshjet e ardhshme si vendas pa praninë e publikut dhe të paguajë gjobë në vlerë prej 4 000 eurove, pas ngjarjeve të ndodhura në sfidën kundër Bregallnicës në Ligën e Dytë të Maqedonisë së Veriut.
Pas këtij vendimi ka ardhur reagimi i kryetarit të klubit, Isuf Bajrami, i cili përmes një postimi në Facebook ka shprehur pakënaqësinë ndaj sistemit dhe funksionimit të organeve sportive.
Reagimi i plotë i kryetarit Isuf Bajrami:
“E njëjta skemë, i njëjti sistem. Ndryshojnë vetëm njerëzit që rrinë aty, por mentaliteti mbetet si para 30 viteve. Kështu nuk mund të vazhdohet më. Meritën duhet ta marrë ai që investon, ai që punon, ai që e do futbollin dhe sportin, jo ai që caktohet nëpër zyra për interesa politike dhe nacionale.
Një thirrje për të gjithë tanët që janë ende aty, mos rrini për një rrogë dhe mos u bëni argat i askujt. Lëshojini vendet nëse as nuk pyeteni, as nuk respektoheni, ose as e dini pse jeni aty. Dinjiteti vlen më shumë.
Dhe për ju, publiku ynë i dashur, që gjithmonë keni qenë me klubin dhe e doni më shumë se gjithçka tjetër, ja çka ndodh për shkak të 2–3 personave që nuk dëgjojnë, edhe kur e dinë se të gjithë i kemi kundër. Por besoni, bashkë do ta përballojmë edhe këtë.
Një gjë duhet ta dinë të gjithë, sa më shumë që mundohen të na shtypin, aq më të fortë kthehemi.
Forca Shkëndija – gjithmonë pranë teje!”
