Shfuqizimi i Qeverisë Teknike është i mundur juridikisht, por praktikisht nuk është në interes të partive opozitare, vlerëson analisti politik, Bashkim Selmani. Sipas tij, një veprim i tillë i shkon në favor partisë në pushtet, e cila synon të krijojë kushte për zgjedhje të parakohshme nën një pushtet pothuajse absolut, duke shmangur çdo pengesë politike në procesin zgjedhor.
“VMRO insiston të ketë pushtet absolut, gjë që më pas hap rrugë për zgjedhje të parakohshme pa asnjë pengesë. Kjo është një praktikë e vazhdueshme e VMRO-së: sa herë që vlerëson se i ka numrat dhe se fitorja është në favor të saj ndërmerr veprime maksimale për të defokusuar gjendjen reale. Kështu shmang vëmendjen nga borxhi i lartë publik, krimi dhe korrupsioni, si dhe nga çështje të hapura, si kontesti me Bullgarinë. Hapja e kësaj teme krijon përplasje mes subjekteve politike dhe largon fokusin nga problemet që janë drejtpërdrejt në interes të qytetarëve, duke i shërbyer vetëm interesit partiak të VMRO-së.”, – deklaroi analisti politik, Bashkim Selmani.
Sipas Selmanit, partitë opozitare nuk duhet të lejojnë abrogimin e Qeverisë Teknike, pasi ajo përfaqëson kompromisin e vetëm funksional mes pozitës dhe opozitës.
“Subjektet e tjera politike, përveç VMRO-së, nuk kanë asnjë interes nga shfuqizimi i Qeverisë Teknike dhe do të dëmtoheshin nëse do ta lejonin një veprim të tillë. Ajo mund të hiqet vetëm në rrethana të caktuara, kur institucionet janë stabile, krimi dhe korrupsioni janë të ulëta, administrata është e depolitizuar dhe borxhi publik është në rënie. Megjithatë, aktualisht kjo temë vetëm hap rrugë për përplasje të reja mes subjekteve politike.”, – theksoi analisti politik, Bashkim Selmani.
Selmani shton se Qeveria Teknike është produkt i një marrëveshjeje politike të imponuar nga faktorë të jashtëm, me qëllim rritjen e besueshmërisë mes pozitës dhe opozitës gjatë proceseve zgjedhore. Aktualisht, ajo mbetet forma e vetme e bashkëpunimit institucional mes dy palëve (TVM2)
