Banorët e lagjes Serava në Shkup po përballen këto ditë me probleme serioze në shërbimet bazë. Përveç ndërprerjeve të energjisë elektrike, ata po raportojnë edhe ndërprerje të shërbimeve të internetit dhe televizionit nga kompania A1 Maqedoni.
Sipas banorëve, ndërprerjet kanë zgjatur prej disa ditësh dhe po shkaktojnë vështirësi të mëdha në jetën e përditshme. Interneti dhe televizioni janë shërbime thelbësore, sidomos për nxënësit që ndjekin mësimin, studentët, si dhe për qytetarët që punojnë nga shtëpia.
“Përveç se po mbetemi pa rrymë, tashmë nuk kemi as internet e as TV. Askush nuk na jep një sqarim të qartë se çfarë po ndodh dhe kur do të rregullohet problemi,” shprehet një banor i lagjes Serava.
Banorët thonë se kanë kontaktuar disa herë shërbimin për klientë të A1 Maqedoni, por nuk kanë marrë informata konkrete për afatin e rikthimit të shërbimeve, sepse mvaret nga EVN.
Deri më tani, nga A1 Maqedoni nuk ka një njoftim zyrtar publik lidhur me këtë problem në lagjen Serava. Qytetarët kërkojnë reagim të shpejtë dhe transparencë nga kompania, si dhe zgjidhje sa më të shpejtë të situatës.
Banorët apelojnë që institucionet përkatëse dhe operatori të marrin masa urgjente, pasi problemet e përsëritura po ndikojnë drejtpërdrejt në cilësinë e jetës në këtë lagje.
Shërbime në kolaps: Banorët e Seravës kërkojnë përgjigje nga A1 Maqedoni
