Sot shënohet përvjetori i Kuvendit të Lezhës, më këtë rast kreu i Lëvizjes Demokratike dhe njëherit zëvendëskryeministër i parë në Qeverinë e Republikës së Maqedonisë së Veriut, Izet Mexhiti përmes një shkrimi në Facebook përkujton se në zemër të Shkupit në sheshin Skënderbe qëndron edhe një mural i gdhendur në gurrë që rrëfen një nga momentet më të lavdishme të historisë sonë, atë të Kuvendit të Lezhës.
“Në zemër të Shkupit, në sheshin që mban emrin e Skënderbeut, qëndron krenar monumenti i heroit tonë kombëtar. Përballë tij, një mural i gdhendur në gurë rrëfen një nga momentet më të lavdishme të historisë sonë, Kuvendin e Lezhës. Aty ku princërit shqiptarë u bashkuan për lirinë, aty ku u hodhën themelet e qëndresës sonë. Sot, teksa ecim në këtë shesh, historia nuk është thjesht një kujtim, ajo jeton mes nesh. Guri flet, kujtimet zgjojnë shpirtin e kombit, dhe hijet e së kaluarës na thërrasin të mos harrojmë kurrë kush jemi! Urime përvjetori i Kuvendit të Lezhës!”, ka shkruar Mexhiti në FB.
