Shtëpia e Bardhë ka publikuar emrat e anëtarëve që do të përbëjnë “Bordin e Paqes” të administratës Trump për Gazën.
Me presidentin e SHBA-së në krye, bordi do të mbikëqyrë punën e një komiteti teknokratësh palestinezë të ngarkuar me qeverisjen e përkohshme dhe rindërtimin e Gazës pas luftës.
Sipas deklaratës zyrtare, çdo anëtar i bordit do të ketë përgjegjësi për një portofol që konsiderohet kritik për stabilizimin e Gazës, megjithëse ndarja konkrete e këtyre roleve ende nuk është bërë publike.
Pjesë e këtij grupi do të jetë Sekretari Amerikan i Shtetit, Marco Rubio, i dërguari special i SHBA-së për Lindjen e Mesme, dhëndri i presidentit Trump Jared Kushner, i cili ka luajtur një rol kyç në negociatat si dhe ish-kryeministri i Mbretërisë së Bashkuar, Tony Blair, i cili është i vetmi anëtar themelues që nuk është shtetas amerikan.
“Shtetet e Bashkuara mbeten plotësisht të përkushtuara për të mbështetur këtë kuadër kalimtar, duke punuar në partneritet të ngushtë me Izraelin, vendet kryesore arabe dhe bashkësinë ndërkombëtare për të arritur objektivat e Planit Gjithëpërfshirës. Presidenti u bën thirrje të gjitha palëve të bashkëpunojnë plotësisht me Bordin e Paqes dhe Forcën Ndërkombëtare të Stabilizimit për të siguruar zbatimin e shpejtë dhe të suksesshëm të Planit Gjithëpërfshirës”, njofton Shtëpia e Bardhë.
Në deklaratën e Shtëpisë së Bardhe theksohet se emrat e anëtarëve te tjerë të bordit do të bëhen publik gjatë javëve të ardhshme.
