Shakira është hapur si rrallë herë që pas ndarjes nga Gerard Piqué. Këngëtarja kolumbiane, në një intervistë për programin “Por el Mundo”, foli me sinqeritet për jetën e saj pas ndarjes dhe për edukimin e fëmijëve të tyre, Milan dhe Sasha. Aktualisht, ajo ndodhet në Argjentinë, ku ka të planifikuara disa koncerte.
Që prej fillimit të lidhjes e deri te ndarja, çifti ka qenë vazhdimisht në qendër të vëmendjes mediatike. Megjithëse kanë kaluar një ndarje të vështirë — që i dha frymëzim edhe disa këngëve të Shakirës — këngëtarja thekson se një gjë ka mbetur e pandryshuar: fëmijët janë prioriteti i tyre absolut. “Milan dhe Sasha janë të parët, gjithmonë”, tha ajo.
“Gerard dhe unë biem dakord për këtë, dhe kjo është ajo që na mban të bashkuar në thelb, edhe pse jetët tona kanë marrë drejtime të ndryshme”, shtoi Shakira. Ajo tregoi se është e lumtur që fëmijët e mbështesin dhe e shoqërojnë kudo në aktivitetet e saj.
Artistja ndau edhe disa detaje për talentet e tyre. Sipas saj, Milani “luan piano, bateri, kitarë dhe tani po mëson edhe bas. Ka një lehtësi të jashtëzakonshme!”. Ndërsa Sasha spikat për “një zë shumë të bukur”. Të dy, shtoi ajo, janë “shumë të disiplinuar”, gjë që u është mësuar që në moshë të vogël.
Kur intervistuesi Alejandro “Marley” Wiebe e pyeti nëse disiplina vinte kryesisht prej saj, Shakira pranoi se një pjesë e madhe e meritës i takon edhe ish-lojtarit të Barcelonës. “Edhe nga Piqué, duhet thënë. Ai është shumë i disiplinuar, sepse nuk mund të kesh sukses ndryshe në asnjë profesion. Mendoj se disiplina është bazike. Ata e dinë që nuk ka mënyrë tjetër. Kjo është e panegociueshme”, u shpreh ajo.
Këngëtarja e “Te felicito” tha se “fëmijët e mi janë arsyeja e ekzistencës sime. Janë dy yjet e mi, diellët e mi, arsyeja e jetës sime, inspirimi im, forca ime… Dhe nuk bëj gjë tjetër veçse mendoj për ta në çdo moment. Ata janë bota ime”.
Gjatë intervistës, Shakira foli edhe për mënyrën se si e ka përballuar ndarjen. “Të kalosh nga zhgënjimi, zemërimi, dhimbja dhe trishtimi për t’i shndërruar në art, kreativitet, frymëzim… Kjo më ndihmoi të shërohem dhe besoj se shumë njerëz u shëruan bashkë me mua”, tha ajo.
