Me një ngjarje solemne, ShA MEPSO shënoi 20 vjet nga formimi i saj si institucion kyç në sistemin elektroenergjetik të Maqedonisë. Jubileu u shënua në prani të anëtarëve të Këshillit Drejtues dhe Këshillit Mbikëqyrës, ministrave, deputetëve, kryetarëve të komunave, ambasadorëve dhe përfaqësuesve të korpusit diplomatik, përfaqësuesve të sektorit energjetik, partnerëve vendas dhe ndërkombëtarë, mediave, si dhe shumë kolegëve – aktivë dhe të pensionuar, mes të cilëve edhe ish-kryetarë të Këshillit Drejtues.
Fjalimin kryesor e mbajti drejtori gjeneral i ShA MEPSO, z. Burim Latifi, i cili u kthye pas në rrugëtimin 20-vjeçar zhvillimor të kompanisë, roli i saj strategjik në sigurimin e një sistemi të qëndrueshëm dhe të sigurt elektroenergjetik, si dhe te reformat aktuale dhe sfidat e ardhshme.
“Shfrytëzoj këtë moment për të shprehur respektin më të thellë për kolegët të cilët, përderisa ne jemi këtu, ata po punojnë në terren, në të ftohtë, si dhe për punonjësit që sonte janë në shërbim në Qendrën Nacionale të Dispeçimit”, theksoi z. B.Latifi.
Ai nënvizoi se në një periudhë të shkurtër, bashkë me ekipet profesionale të MEPSO-s, janë realizuar ndryshime të rëndësishme rregullatore dhe operative me qëllim rritjen e transparencës dhe konkurrencës në tregun e energjisë elektrike. Përmes futjes së mekanizmave për prokurim të energjisë elektrike për mbulimin e humbjeve dhe për balancim përmes bursës së energjisë elektrike, janë arritur kursime të matshme financiare për kompaninë dhe për shtetin, ndërsa njëkohësisht është rritur stabiliteti i sistemit elektroenergjetik.
“Jemi para një kthese të rëndësishme gjenerate. Një pjesë e kolegëve tanë më me përvojë po e përmbyllin karrierën e tyre, dhe detyra jonë është që njohuritë dhe përvoja e tyre të kalojnë te brezat e rinj të inxhinierëve të rinj dhe potencial. Profesionalizmi dhe përkushtimi i punonjësve janë kapitali më i madh i MEPSO-s”, porositi drejtori gjeneral.
Ministrja e Energjetikës, Minierave dhe Lëndëve të Para, znj. Sanja Božinovska, gjithashtu mbajti një fjalim në këtë event, e cila theksoi rolin e MEPSO-s si një operator i qëndrueshëm dhe i besueshëm dhe një faktor i rëndësishëm në procesin e integrimit evropian të sektorit energjetik. Gjatë ceremonisë, Ministrja Božinovska pranoi mirënjohje për mbështetjen dhe kontributin në zhvillimin e energjetikës, nga ana e drejtorit gjeneral Burim Latifi.
“Në zemrën e MEPSO-s janë njerëzit – breza inxhinierësh, teknikësh dhe ekspertësh që me profesionalizmin, përgjegjësinë dhe përkushtimin e tyre çdo ditë kujdesen që sistemi elektroenergjetik të funksionojë në mënyrë të qëndrueshme dhe të sigurt. Jam e bindur se MEPSO edhe në të ardhmen do të jetë urë lidhëse mes sistemit energjetik nacional dhe atij evropian dhe motor i tranzicionit të gjelbër”, theksoi Bozhinovska.
Fjalime mbajtën edhe drejtorët e njësive OST– Operatori i sistemit elektrotransmetues dhe ORrT– Operatori i rrjetit të transmetimit, z. Sashko Lakinski dhe z. Vase Jovevski, të cilët folën për historinë, zhvillimin dhe arritjet kyçe të kompanisë në dy dekadat e kaluara.
Shënimi i 20-vjetorit paraqet konfirmim të rëndësishëm për pjekurinë institucionale të ShA MEPSO dhe përkushtimin e saj ndaj furnizimit të sigurt, menaxhimit përgjegjës të burimeve publike dhe zhvillimit të vazhdueshëm të sistemit nacional elektroenergjetik.
