Kryetari i komunës së Zhelinës, Blerim Sejdiu në intervistën për Alsat-M u është përgjigjur pretendimeve të Arben Taravarit i cili tha se një parti politike do dalë nga VLEN dhe do t’i bashkohet opozitës. Sejdiu kërkoi që ai ta konkretizojë këtë çështje.
“Ne shohim çdo ditë se eksponentë të caktuar nga AKI vijnë dhe anëtarësohen në VLEN. Kishim një rast të tillë para dy ditësh, pastaj para një muaji ku dy deputetë ikën nga AKI dhe siç po ecin punët kemi frikë se do vijnë edhe gjithë liderët e AKI te ne, por kjo nuk do të ishte mirë”, ka thënë Sejdiu.
Ai shton se rezultatet e VLEN në qeveri janë të dukshme, ekziston bashkëpunim shumë konstruktiv me VMRO-në dhe nuk jemi nga ato siç tha, “të bëjnë piar duke keqpërdorur temat e studentëve, medresantëve, përfaqësimin e drejtë”.
“Përfaqësimi i drejtë për herë të parë bëhet ligj i veçantë dhe do arrijë së shpejti në Kuvend, është çështje e kryer në aspekt të formalizmit”, tha ai.
Lidhur me rikonstruimin e qeverisë theksoi se do jetë vendim i kryesisë së VLEN dhe do të shihet se cilat pozicione do të ndryshojnë.
Me rëndësi sipas tij është që të funksionojnë si VLEN dhe kjo është mbi të gjitha, sepse ajo funksionon me të gjitha organet deri në bazë.
Më i përafërt ka qenë opsioni me rotacion të liderëve
“Ka ngelur pjesa që është duke u diskutuar mes liderëve që të zgjidhet kryetari i VLEN ku janë disa opsione. Janë duke e shqyrtuar se cila do jetë më e pranueshme. Më i përafërt ka qenë opsioni me rotacion të liderëve”, ka thënë Sejdiu.
Në pyetjen se a është Fatmir Limani, ministër i koalicionit VLEN, Sejdiu me përgjigje të prerë:
“Është ministër i VLEN dhe si anëtar ka marrë pjesë çdoherë në takimet e kryesisë”, ka thënë Sejdiu.
