Deputetja e VLEN, Saranda Imeri në “Debat në Shenja” ka folur rreth asaj se sa janë aktiv deputetët në Kuvend, si nga VLEN dhe opozita. Sipas saj, fatkeqësisht ka deputetë që madje nuk e kanë arsyetuar asnjëherë mosardhjen në Kuvend.
“Me mburrje mund të them se grupi parlamentar i VLEN gjatë kësaj periudhe 15 mujore ka qenë më se aktiv në foltore sa u takon propozim ligjeve dhe replikave. Fatkeqësisht ka deputet që nuk e kanë arsyetuar asnjëherë mosardhjen në Kuvend, konkretisht është z. Ali Ahmeti të cilin për një vit e gjysmë apo gati 2 vite e kam parë vetëm dy herë në Kuvend, asnjëherë nuk ka marrë fjalë, të propozojë ndonjë ligj apo të marrë fjalë për replikë. Këtu përmend poashtu edhe Menduh Thaçin dhe Ziadin Selën. Janë të zgjedhur të popullit, duhet të jenë aty dhe të marrin përgjegjësi”, tha Imeri.
Ajo shton se si VLEN kanë bërë punën e tyre në Kuvend, duke arsyetuar mandatin dhe votat për çka janë zgjedhur.
“Grupi ynë parlamentar ka qenë propozues i disa propozim- ligjeve që kanë kaluar në Kuvend, si propozim- ligji për mbrojtjen e fëmijëve, shtesat e personave më aftësi të kufizuara, vauçerët e studentëve etj”, ka thënë mes tjerash deputetja Imeri.
