Zëvendëskryeministri i parë dhe ministri për Çështje Evropiane, Bekim Sali ka uruar Vetëvendosjen dhe Albin Kurtin për fitoren bindëse në zgjedhjet parlamentare në Kosovë.
Sipas tij, Kosova sot dëshmoi një pjekuri të lartë demokratike.
“I përgëzoj të gjitha subjektet politike për pjesëmarrjen dhe kontributin e tyre në këtë proces të rëndësishëm.
Shpresojmë që institucionet e reja të konstituohen sa më shpejt, në frymë bashkëpunimi dhe uniteti, për t’u përballur me sfidat dhe për të vazhduar rrugën e zhvillimit, integrimit, stabilitetit dhe mirëqenies për të gjithë qytetarët”, thekson Sali.
Siç shprehet ai, fituesi i këtyre zgjedhjeve tashmë po rikonfirmohet.
“Albin Kurti, me mbështetjen e fuqishme popullore, mbetet garanci e zhvillimit, sovranitetit dhe sigurisë në Kosovë. Urime Kosovë!”, shkruan zëvendëskryeministri i parë Sali.
