Zv/kryeministri i parë i Qeverisë, Bekim Sali, ka kujtuar sot Masakrën e Reçakut, duke e cilësuar atë si një nga aktet më të rënda të gjenocidit ndaj civilëve shqiptarë dhe një nga momentet më të errëta të historisë kombëtare.
“Sot kujtojmë me dhimbje të thellë Masakrën e Reçakut, një akt të papranueshëm të gjenocidit kundër civilëve, të cilëve iu mor jeta vetëm për shkak të përkatësisë së tyre shqiptare”, ka shkruar Sali, duke theksuar se ëndrra për liri dhe drejtësi u pagua me jetën e shumë të pafajshmëve, duke lënë pasoja të rënda në familjet shqiptare.
Sipas tij, Reçaku mbetet një kujtesë e përhershme për rrezikun e dhunës dhe padrejtësisë. “Masakra e Reçakut është një nga momentet më të trishta të historisë sonë, dhe kujtimi i saj është i domosdoshëm për të mos lejuar që dhuna dhe padrejtësia të përsëriten”, ka theksuar zv/kryeministri i parë.
Ai ka rikujtuar edhe reagimin ndërkombëtar pas ngjarjes, duke përmendur vizitën e ambasadorit të atëhershëm të OSBE-së, William Walker, një ditë pas masakrës. Sali ka cituar deklaratën e Walkerit, i cili pas vizitës në vendin e ngjarjes kishte deklaruar:
“Nga ajo që pashë, nuk ngurroj të përshkruaj ndodhinë si masakër dhe krim kundër njerëzimit. Kjo është ngjarja më trishtuese në jetën time.”
Në fund, Bekim Sali ka theksuar se kujtimi i viktimave të Reçakut është një detyrim i përhershëm moral dhe historik. “Të mos harrojmë kurrë sakrificat e atyre që luftuan për lirinë dhe dinjitetin e tyre, dhe të vazhdojmë të punojmë për një botë ku dhuna dhe urrejtja nuk gjejnë vend”, ka përfunduar ai.
