Kandidati për kryetar të Gostivarit nga VLEN, Sabedin Dauti në paraqitjen e tij sonte para shumë mbështetësve tha se ky shesh është zemra e ndryshimit dhe është fillimi i fundit ndaj keqmenaxhimit tetëvjeçarë të kësaj garniture që udhëheq me pushtetin lokal.
Tetë vite, shton Dauti, ka pasur një Gostivar të zhytur në borxhe, ku ka munguar transparenca dhe një komunë që ishte simbol i paaftësisë dhe mashtrimit.
“Nga ky shesh japim mesazh se koha e tyre ka mbaruar dhe e ardhmja e Gostivarit sapo fillon, nuk vijmë me fjalë boshe, por me plan dhe vizion të qartë mbi të cilat do ta ngremë Gostivarin”, tha Dauti.
Ai në programin e tij parasheh infrastrukturë moderne dhe transport të qëndrueshëm, ujësjellës, kanalizim dhe menaxhim të ujërave, sepse siç shton, “çdo shtëpi meriton ujë të pastër e sistem funksional”.
“Gostivari do të jetë qytet i pastër, qytet i gjelbër dhe që merr frymë lirshëm me arsim dhe rini inovative”, ka thënë mes tjerash, Dauti nga VLEN.
