Shtetet e Bashkuara tani i kuptojnë më mirë kushtet nën të cilat Rusia do të ishte e gatshme të përfundonte luftën në Ukrainë, pas takimit midis të dërguarit të presidentit Donald Trump, Steve Witkoff, dhe presidentit rus Vladimir Putin – deklaroi sekretari amerikan i shtetit, Marco Rubio.
“Ndoshta për herë të parë në këtë administratë, kemi shembuj konkretë të kërkesave që Rusia do të parashtronte për t’i dhënë fund luftës,” tha Rubio gjatë një interviste për Fox Business Network. Ai shtoi se elementët kyç të çdo marrëveshjeje të mundshme do të përfshijnë çështje territoriale.
Rubio theksoi gjithashtu se mbetet ende shumë punë përpara një takimi të mundshëm midis presidentit Trump dhe homologut të tij rus, Vladimir Putin, për të arritur një zgjidhje përfundimtare të konfliktit në Ukrainë.
“Sot ishte një ditë pozitive, por kemi ende shumë punë përpara. Ka shumë pengesa për t’u kapërcyer. Shpresojmë që do të arrijmë përparim në ditët dhe orët në vijim – ndoshta edhe në javët që vijnë,” tha Rubio menjëherë pasi Shtëpia e Bardhë konfirmoi raportimin e New York Times, se Trump “është i hapur” për t’u takuar personalisht si me Putinin, ashtu edhe me presidentin ukrainas, Volodymyr Zelensky.
