Shkolla Fillore Komunale “Dituria” – Saraj dënon çdo formë të dhunës dhe sjelljes së papranueshme brenda dhe jashtë hapësirave shkollore. Në lidhje me përleshjen që ka ndodhur sot ndërmjet disa nxënësve, dëshirojmë të informojmë të gjithë prindërit dhe komunitetin se institucioni ynë ka ndërmarrë menjëherë të gjitha hapat e nevojshëm.
Stafi i shkollës ka reaguar në momentin e incidentit, duke siguruar qetësimin e situatës dhe ofrimin e mbështetjes së menjëhershme për nxënësit e përfshirë. Rasti është evidentuar sipas procedurave dhe është raportuar tek organet kompetente për trajtim të mëtejshëm.
Ne jemi të përkushtuar të krijojmë një ambient të sigurt, edukativ dhe mbështetës për të gjithë nxënësit tanë. Shkolla do të vazhdojë të bashkëpunojë me prindërit, komunitetin dhe institucionet përkatëse për të parandaluar raste të tilla dhe për të promovuar respekt, dialog dhe sjellje të përgjegjshme tek çdo fëmijë.
Kërkojmë bashkëpunimin e prindërve në nxitjen e komunikimit, mirëkuptimit dhe zgjidhjes paqësore të konflikteve, me qëllim që të sigurojmë të ardhme më të mirë për nxënësit tanë.
Me respekt,
Drejtoresha
Fatime Feta
