Presidenti aktual i Kroacisë, Zoran Milanoviq, i mbështetur nga Partia Socialdemokrate (SDP), ka fituar zgjedhjet presidenciale në vend, sipas sondazheve dalëse (exit polls), transmeton Anadolu.
Pas mbylljes së qendrave të votimit në orën 19:00, firma kërkimore “Ipsos” publikoi sondazhet dalëse, sipas të cilave, Milanoviq është zgjedhur president për herë të dytë me 77,86 për qind të votave në raundin e dytë.
Milanoviq shprehu falënderimet e tij në një postim në rrjetet sociale.
Rivali kryesor i Milanoviqit, ish-ministri i Arsimit Dragan Primorac i Bashkimit Demokratik Kroat (HDZ) të qendrës së djathtë në pushtet, ka marrë 22,1 përqind të votave.
Ai u shpreh pas disfatës se me programin e tij donte të dërgonte një mesazh se Kroacia mund dhe meriton më mirë.
“Vendimi është marrë nga qytetarët dhe duhet respektuar”, tha Primorac.
Zgjedhjet presidenciale në Kroaci mbahen çdo pesë vjet dhe fituesi mund të shërbejë maksimumi dy mandate.
Në raundin e parë të zgjedhjeve të mbajtur më 29 dhjetor, Milanoviq mori 49,1 për qind të votave, ndërsa kundërshtari i tij Primorac 19,4 për qind, duke kaluar në balotazh.
