Tre tërmete në vetëm 10 minuta kanë trazuar mbrëmë Maqedoninë, më i forti prej tyre ka arritur 3.2 gradë sipas shkallës Rihter. Lëkundjet filluan pak pas mesnate duke lënë shumë qytetarë në frikë dhe pasiguri.
Sipas Observatorit Sizmologjik Evropian-Mesdhetar (EMSC), tërmeti i parë është regjistruar në orën 01:12 të mëngjesit, me epiqendër afër Dojranit në një thellësi prej 11 kilometrash. Vetëm një minutë më vonë, në të njëjtin vend, u regjistrua një tërmet i dytë, këtë herë me magnitudë 2.2 ballë.
Dhjetë minuta më vonë, tërmeti i tretë tronditi Shkupin. Ky tërmet me epiqendër në pikën kufitare “Blacë” me Kosovën, ka qenë me magnitudë 2.5 ballë dhe thellësi 13 kilometra.
