Në minutën e 79-të, Vinicius Junior u ndëshkua direkt me të kuq për goditje të portierit kundërshtar. Menjëherë në minutën e 80-të në fushë hyri Luka Modriq.
Dhe ikona kroate doli të jetë shumë i rëndësishëm për Real Madridin.
Legjenda e Real Madridit shënoi në minutën e 85-të, pas asistimit të Jude Bellinghamit, për t’ia siguruar barazimin e rezultatit në 1:1 madrilenëve.
Anglezi Bellingham më pas, në minutën e 96-të, shfrytëzoi maksimalisht një gabim të mbrojtjes së Valencias dhe shënoi për fitoren e madhe të Madridit.
Madridi të premten mbrëma fitoi 2:1 në udhëtim ndaj Valencias, në ndeshjen e mbetur të xhiros së 12-të të La Ligas.
Kjo ndeshje është dashur të zhvillohet më 2 nëntor, por ishte shtyrë për shkak të vërshimeve në regjionin e Valencias.
Ndeshja ishte shumë interesante. Valencia kaloi në epërsi 1:0 me golin që e shënoi Hugo Duro në minutën e 27-të.
Jude Bellingham humbi penallti në minutën e 55-të, ndërsa Kylian Mbappes iu anulua një gol në minutën e 60-të për shkak të pozitës jashtë loje.
Situata u bë edhe më e vështirë për Madridin në minutën e 79-të, kur Vinicius Junior ra në provokim dhe goditi portierin e Valencias, Stole Dimitrievski.
Por Modriq ishte edhe një herë vendimtar, kurse goli i Bellinghamit i dha vulë takimit. Valencia goditi shtyllën në minutën e 100-të, por i mungoi fati.
Real Madridi tani është lider me 43 pikë nga 19 ndeshje. 41 pikë i ka Atletico Madridi në pozitën e dytë, nga 18 ndeshje. Barcelona është e treta me 38 pikë nga 19 ndeshje.
Valencia është në pozitë shumë të vështirë. Është e parafundit me vetëm 12 pikë nga 18 ndeshje.
