Prokuroria Themelore Publike Shkup ka nisur procedurë hetimore ndaj një gruaje 28-vjeçare të dyshuar për tentim-vrasje – vepër penale sipas nenit 123 paragrafi 2 pika 2 në lidhje me nenin 19 të Kodit Penal.
Sipas Prokurorisë, më 15 gusht në shtëpinë në rrugën “Boris Bojadžiski” në Shkup, gjatë një akti dhune në familje, e dyshuara ka tentuar t’ia marrë jetën gjyshes së bashkëshortit të saj, e lindur në vitin 1938, me të cilën jetonin në bashkësi familjare.
Ndërkohë që viktima po pushonte në një nga dhomat, e dyshuara ka hyrë, ka mbyllur derën dhe është ulur mbi të, duke i vendosur jastëkun mbi kokë me qëllim që ta mbytë, ndërkohë që e ka goditur edhe me grushte në kokë. Ajo ka ndalur sulmin duke menduar se viktima kishte vdekur, e më pas i ka treguar bashkëshortit për atë që kishte bërë.
Bashkëshorti menjëherë ka lajmëruar policinë, ndërsa ekipi mjekësor e ka transportuar të moshuarën në spital, ku janë konstatuar mavijosje në kokë dhe nofull, si dhe disa hematoma.
Prokurori publik i ka dorëzuar gjykatësit të procedurës paraprake pranë Gjykatës Themelore Penale Shkup një propozim për caktimin e masës së paraburgimit për të dyshuarën. Nga Prokuroria theksojnë se ekzistojnë rrethana të qarta që tregojnë rrezikun se ajo mund ta përsërisë veprën ose ta përfundojë tentim-vrasjen.
