Qipro ka marrë drejtimin e presidencës gjashtëmujore të Bashkimit Evropian, në një periudhë që për Evropën karakterizohet nga pasiguri politike, sfida ekonomike dhe tensione gjeopolitike në rajonin e Mesdheut.
Autoritetet qipriote kanë bërë të ditur se gjatë këtij mandati fokusi kryesor do të jetë forcimi i sigurisë dhe stabilitetit rajonal, me theks të veçantë në Mesdheun Lindor. Njëkohësisht, Qipro synon të avancojë zbatimin e plotë të Paktit për Migracionin dhe Azilin, duke e konsideruar menaxhimin e migracionit si një nga çështjet më të ndjeshme për Bashkimin.
Në agjendën e presidencës qipriote përfshihet edhe mbështetja e procesit të integrimit evropian të vendeve të Ballkanit Perëndimor, si dhe forcimi i bashkëpunimit ekonomik me rajonin. Mbrojtja e klimës, zhvillimi i energjisë së rinovueshme dhe forcimi i sovranitetit dixhital janë gjithashtu pjesë e prioriteteve të shpallura për këtë mandat.
Presidenti i Qipros, Nicos Christodoulides, ka deklaruar se vendi i tij do të bashkëpunojë ngushtë me Komisionin Evropian dhe Parlamentin Evropian për të shtyrë përpara projekte konkrete dhe vendimmarrje efikase.
“Një Bashkim autonom është ai që është i fortë nga brenda, i aftë mbi të gjitha të mbrojë qytetarët e tij, kufijtë dhe interesat e veta. Një Bashkim që është në gjendje të krijojë partneritete dhe aleanca nga pozita force, plotësisht i vetëdijshëm se sa më i fortë të jetë, aq më i vlefshëm bëhet për partnerët e tij. Një Bashkim i orientuar nga jashtë dhe i hapur ndaj botës”, deklaroi presidenti i Qipros, Nikos Christodoulides, gjatë prezantimit të programit të presidencës.
Sipas rendit rotativ, pas përfundimit të këtij mandati, presidencën gjashtëmujore të Bashkimit Evropian do ta marrë Sllovenia.
Autoritetet qipriote theksojnë se presidenca do të udhëhiqet mbi parimet e transparencës dhe bashkëpunimit, duke e parë këtë mandat si një mundësi për të forcuar rolin strategjik të Qipros në Evropë dhe Mesdhe.
