shkruan: Naser Pajaziti
Ish-kryeministri socialdemokrat Zoran Zaev në disa raste para ardhjes në pushtet në vitin 2015 kishte deklaruar se do të publikojë “bombat” lidhur me vrasjen e 12 prillit të 2012 në Liqenin e Smilkovës, ku u vranë katër të rinj dhe një peshkatar në rrethana misterioze.
Ai kishte theksuar se opinioni do të shokohet lidhur me ngjarjen, por sot e kësaj dite 13 vite më pas ai hezitoi dhe fshehu të vërtetën duke heshtur dhe duke mos publikuar materialet e përgjimeve që i kishte poseduar, përcjell INA.
“Ne premtuam se do të publikojmë gjithçka që posedojmë. Do të publikojmë edhe materiale për rastin “Monstra” i cili është posaçërisht një rast i tmerrshëm ku mbetën të vrarë katër fëmijë dhe një person i rritur pranë liqenit të Smillkovës. Janë të vrarë maqedonasit ndërsa janë të burgosur shqiptarët. Tërë të vërtetën që e posedojmë për këtë rast do ta publikojmë “ kishte theksuar Zoran Zaev në një intervistë të 15 marsit të 2015 për agjencinë bullgare “Fokus”.
Deklarata tjetër e radhës një muaj më pas të 2015:
“Atë çfarë do të zbardh janë biseda telefonike dhe sms porosi, unë nuk do t’i interpretoj, publiku do t’i interpretojë, si edhe procesin e deritanshëm. Ajo e vërtetë do të japë përgjigje për shumë pyetje. Mundet që ky proces nuk do t’i japë të gjitha përgjigjet, por do të japë përqindje të madhe të përgjigjeve dhe do të pastrojë shumë mjegull që ende është mbi këtë proces”, tha Zoran Zaev (03.04.2015)
Në maj të 2015 Deutsche Welle transmetoi një deklaratë të opozitarit të atëhershme Zoran Zaev.
Aty thuhej: “Njerëz të pafajshëm janë në burg për Liqenin e Smilkovës.” Zaev fillimisht e bëri deklaratën në mënyrë origjinale, për gazetën gjermane “Die Zeit”. Por, pasi lajmi fitoi një dimension rajonal, Zaev u tërhoq. Ai nuk tha saktësisht ashtu, por kishte një dyshim serioz nëse të dënuarit ishin fajtorë.
“Me siguri ndoshta është gabim në interpretimin e vetë gazetarit, por natyrisht se për këtë rast janë të lidhura dyshime të mëdha dhe unë këtë e shpjegoj në intervistë dhe gjithsesi me zbulimin e të vërtetës për Liqenin e Smilkovës ose projektin e qeverisë ” Monstra ” siç e quajtën me padinë penale do të zbulojë të vërteta të dhimbshme dhe sigurisht që dyshimet janë të mëdha. Synimi ynë nuk është të bëjmë kualifikime, por posa të zbulojmë të vërtetën, qytetarët do të dinë se çfarë paraqet ajo”, deklaroi kryetari i LSDM-së, Zoran Zaev me 27 maj të viti 2015.
Ish-lideri i LSDM-së kishte vijuar me deklarata të tilla bombastike.
Sipas tij, në një intervistë të dhënë më 2017 për “Kurir” kishte theksuar se ka fjalë që thonë se nuk ka dëshmi që të dënuarit për vrasjen në Smilkovë janë fajtorë. Këtë konstatim Zaevi e bazonte në përgjimet. Në intervistën për ”Kurir”, Zaev thotë se përgjimet tregojnë se ka tendenca serioze që pushteti të tregojë që shqiptarët vrasin maqedonas.
Në bazë të asaj që ka dëgjuar, Zaev kishte thënë se mendon se pushteti është i përfshirë në këtë rast, edhe pse nuk ka dëshmi konkrete.
Edhe më 2018 po ashtu ka vijuar me deklarata të tilla si më poshtë:
Por Zaev nga prilli i 2018 kishte nisur të jap versionin e deklaratave ndryshe duke theksuar se të gjitha dëshmitë që i ka poseduar i ka dorëzuar, ndërkaq atë që e ka pasur ka qenë e mjaftueshme që hetimi të vazhdojë dhe rasti të zbardhet deri në fund.
“Nuk kam pasur qëllim as atëherë, dhe nuk kam qëllim as tani që ta luajë hetuesin. Nëse kam pasur di[ka minimum më të qartë për opinionin do ta publikoja. Ua tregova bisedat prindërve të fëmijëve të vrarë që t’ua qetësojë shpirtin e tyre. Por të gjithë ne që na është irrituar shpirti duhet që ta qetësojmë nëpërmjet procesit gjyqësor”, kishte deklaruar Zaev.(30.04.2018)
Pas çdo pyetje para dhe pas ardhjes në pushtet, Zaev ishte decid se gjithçka do të zbardhet, por gjithçka ishte vetëm një manipulim me opinionin dhe kurrë nuk u publikua dhe nuk shpërtheu e ashtuquajtura bombë për “Monstra”, që sipas tij, mund të acaronte marrëdhëniet ndëretnike në Maqedoninë e Veriut. Pas shumë deklaratave të tij alarmuese dhe cënuese, ai nuk dha kokërr përgjegjësie as para organeve të drejtësisë. (INA)
