Deputetja e koalicionit VLEN, Mimoza Musa në një intervistë për Alsat M lidhur me kërkesën e studentëve që provimi i jurisprudencës të jepet edhe në gjuhën shqipe, tha se një kërkesë e tillë është legjitime dhe VLEN e mbështet një nismë të tillë.
“Ky problem daton që nga viti 2019, ndërsa ka hyrë në fuqi në vitin 2020. Ka zbrazëtira ligjore, kushtetuta e njeh gjuhën shqipe dhe duhet që provimi i jurisprudencës të mundësohet të jepet në gjuhën shqipe. Në takimin që pata me kolegët e VLEN jemi në gjetje e sipër të një modusi që me harmonizimin a akteve ligjore ta tejkalojmë këtë problem dhe të mos lejojmë ky provim të bëhet barrierë gjuhësore për studentët”, tha Musa.
Sipas saj, BDI ka pasur hapësirë të mjaftueshme që ta mundësojë këtë provim në shqip, nuk e ka bërë dhe tani nga opozita po bën zhurmuesin, duke ia lënë fajin VLEN-it.
“Sigurisht jam pro ligjeve që mundësojnë të tejkalojmë një problem që tangon shoqërinë si dhe të tejkalojmë inatet politike, pavarësisht a vjen propozimi nga qeveria apo opozita, nëse janë në të mirën e përgjithshme konkretisht të këtyre studentëve, jam për t’i mbështetur”, ka thënë tutje Musa.
Kodi zgjedhor, VLEN me dy emra në grupin e punës
Sa i takon Kodit zgjedhor dhe grupeve të punës në Kuvend, Musa tha se koalicioni VLEN ka dërguar dy emra, Saranda Imerin dhe Zekerija Tahirin në përpilimin e Kodit të ri zgjedhor dhe javët në vazhdim pret të fillojnë bisedimet mes anëtarëve të grupit.
Thotë se nuk kanë ende një qëndrim për një Njësi zgjedhore.
“Jemi në bisedime edhe pro asaj të gjendet Kod zgjedhor ku do të përfshihen listat e hapura si dhe diaspora në votime. Jemi në komunikim të vazhdueshëm që të shihen të gjitha modelet, cili format është më i dobishëm për gjithë shoqërinë dhe shtetin”, u shpreh deputetja Musa.
Ajo thotë se nuk presin bllokada nga opozita lidhur me ligjin për përfaqësimin e drejtë, por mbështetje i cili garanton përfaqësimin e drejtë dhe adekuat në institucione shtetërore.
VLEN, shton ajo mbështet shfuqizimin e qeverisë teknike, por në takimin e liderëve siç tha është theksuar të votohet tani, por të hyjë në fuqi në zgjedhjet e ardhshme parlamentare kur ato të mbahen.
