Me thirrjen kryesore “Drejtësi për Faton Lurin, jo gjykim selektiv”, shumë qytetarë marshuan në formë proteste nga Çairi deri te Gjykata Penale në Shkup, përcjell TV21. Protestuesit e konsiderojnë të padrejtë dënimin me 11 vjet burg ndaj Lurit, i cili më 1 korrik 2025 me motoçikletë përplasi për vdekje 68-vjeçarin Jugosllav Nikollovski. Përndryshe, sipas autoriteteve, ditën e aksidentit, 25-vjeçari Faton Luri, duke drejtuar një motor Kawasaki pa patentë shoferi dhe pa helmetë, në shtegun për këmbësorë në bregun e Vardarit, përplasi 68-vjeçarin Nikollovski, dhe sipas hetimit, pas aksidentit ai ishte në arrati për dy ditë. Por këtë e mohon bashkudhëtari i tij, Hamza Ibrahimi, i cili thotë se Fatoni ka qëndruar në vendngjarje, është përpjekur ta ndihmojë të moshuarin.
“Me shpejtësi kemi qenë 25/30, normal ata e kanë nxjerrë 35, ne kemi qenë 25/30. Faton Luri e mori të ndjerin ndihmë t’i japë, pas 2-3 minutave erdhi policia. Fatoni e kishte të ndjerin ende në krah. Pastaj Policia i tha lëshoje të ndjerin sepse do të vijë ambulanca. Fatoni normal i tha thirre ambulancën sa më shpejtë. Pastaj ambulanca erdhi pas 40 minutave, që ta marrë të ndjerin. Fatoni ka qenë aty pas ngjarjes. Normal është larguar pas 10 minutave, pasi erdhi Policia. Ka ndejtur policia. Kur u mblodhën familjarët, fqinjët, filluan të bërtasin. Fatoni u largua nga vendi i ngjarjes. Pas disa kohe Fatoni ka shkuar vetë në stacion, është lajmëruar vetë. Nuk ka ardhur policia që ta marrë”, tha Ibrahimi.
