Zëvendëskryeministri i parë dhe kandidati për kryetar të Komunës së Çairit nga koalicioni VLEN, Izet Mexhiti, ka shprehur mbështetjen e tij të plotë dhe pa rezerva për protestën e mbajtur sot në Prishtinë me moton “Drejtësi për Çlirimtarët”.
Mexhiti theksoi se, ndonëse ndodhet në mes të një fushate zgjedhore për zgjedhjet lokale të 19 tetorit, ka vendosur të mos e keqpërdorë këtë kauzë madhore për përfitime politike, duke nënvizuar se protesta e sotme ngërthen në vete vlerat më të larta të dinjitetit dhe historisë kombëtare, të cilat qëndrojnë përtej çdo gare elektorale.
“Qëndrimi im ka qenë dhe mbetet i palëkundur: Lufta e UÇK-së në Kosovë, në Preshëvë dhe në Maqedoni ka qenë luftë e drejtë, e pastër dhe e nevojshme për mbrojtjen e identitetit shqiptar dhe për shtetformim,” deklaroi Mexhiti.
Ai u shpreh kundër çdo përpjekjeje për të barazuar agresorin me viktimën, duke i cilësuar këto tendenca si të papranueshme si në të drejtën ndërkombëtare, ashtu edhe në atë zakonore.
Duke vënë në pah zhvillimet pozitive në Kosovë, Mexhiti tha se sot ajo është një shtet me sovranitet të konsoliduar, ku institucionet funksionojnë në gjithë territorin, përfshirë edhe në veri. Ai përmendi me theks se strukturat paralele janë eliminuar dhe se shteti tashmë ushtron autoritetin e tij në çdo cep.
“Republika e Kosovës sot është shtet me dinjitet, një entitet që nuk varet më nga mëshira e emisarëve, por që vepron me vetëdije të plotë politike dhe sovrane,” u shpreh Mexhiti.
Në deklaratën e tij, ai bëri edhe dallimin mes qasjes aktuale të drejtuesve shtetërorë dhe atyre që më parë, sipas tij, tregtuan lirinë për përfitime personale, pushtet dhe financa.
Në fund të reagimit të tij, Mexhiti përmbylli me një thirrje simbolike:
“Kosova ka zot shpie! Liria ka emër! Liri për çlirimtarët!”
