Zëvendësministrja e Mjedisit Jetësor dhe Planifikimit Hapësinor,Ane Llashkoska, sot mori pjesë dhe iu drejtua të pranishmëve në ngjarjen përmbyllëse të projektit “Hub-i i Eko-Inovacionit”, i cili u realizua me mbështetjen e Ministrisë së Mjedisit Jetësor dhe Planifikimit Hapësinor dhe u mbajt në ambientet e Fakultetit Ekonomik në Prilep. Me fjalime përshëndetëse u drejtuan edhe prof. dr. Monika Angeloska-Diçovska dhe dekane e fakultetit, prof. dr. Tatjana Spaseska.
Në kuadër të ngjarjes u prezantuan rezultatet e projektit, laboratori i sapoformuar për eko-inovacione, si dhe pajisjet dhe eko-produktet e punuara nga studentët dhe stafi mësimor. “Hub-i i Eko-Inovacionit” përfaqëson një hapësirë akademike bashkëkohore që mundëson zbatimin e parimeve të ekonomisë qarkore, teknologjive 3D dhe praktikave të qëndrueshme, përmes një cikli të plotë – nga selektimi dhe riciklimi i plastikës, deri te ekstrudimi i filamentit dhe printimi 3D.Duke iu drejtuar të pranishmëve, zëvendësministrja Llashkoska theksoi se iniciativa të tilla kanë rol kyç në lidhjen e arsimit, inovacionit dhe mbrojtjes së mjedisit jetësor, duke nënvizuar rëndësinë e zbatimit praktik të njohurive dhe përfshirjes aktive të të rinjve në tranzicionin e gjelbër.
“Kur flasim për tranzicion të gjelbër, nuk flasim vetëm për politika dhe strategji, por për dije, aftësi dhe njerëz. Këto hube janë vende ku të rinjtë jo vetëm mësojnë, por krijojnë zgjidhje për të ardhmen dhe bëhen bartës aktivë të ndryshimeve të qëndrueshme,” deklaroi Llashkoska.
Ajo shtoi se mbështetja për projektin “Hub-i i Eko-Inovacionit” është pjesë e angazhimeve të Ministrisë për zhvillimin e aftësive të gjelbra, zbatimin e teknologjive inovative dhe nxitjen e modeleve qarkore të biznesit, në përputhje me politikat evropiane dhe Marrëveshjen e Gjelbër Evropiane.
U theksua posaçërisht roli aktiv i studentëve, të cilët përmes punëtorive dhe punës praktike morën pjesë në zhvillimin dhe prodhimin e eko-produkteve, duke fituar njohuri praktike dhe kompetenca të nevojshme për tregun bashkëkohor të punës.
Ngjarja përfundoi me një sesion demonstrues të proceseve të riciklimit, ekstrudimit dhe printimit 3D, si dhe me një diskutim të hapur mbi mundësitë për bashkëpunim të mëtejshëm dhe zhvillim të iniciativave të tilla inovative akademike.
Ministria e Mjedisit Jetësor dhe Planifikimit Hapësinor mbetet partner i përkushtuar në mbështetjen e projekteve që kontribuojnë në arsim të qëndrueshëm, inovacione dhe afrimin me standardet evropiane për ekonomi të gjelbër dhe qarkore.
Promovohet “Hub-i (qendra e) i Eko-Inovacionit” në Fakultetin Ekonomik – Prilep: arsim, inovacion dhe ekonomi qarkore në praktikë
