Me kërkesë të presidentes Gordana Siljanovska Davkova, Ministria e Drejtësisë përgatiti një projektligj të ri për falje, për të parandaluar keqpërdorimet e ligjit aktual, që sipas saj është jofunksional dhe i paqartë. Ligji i ri heq të drejtën e presidentit për abolicion të plotë dhe e lejon vetëm uljen e dënimit për personat e dënuar me vendim të formës së prerë. Davkova thekson se Ministria e Drejtësisë duhet të vazhdojë të japë vlerësimin se kush mund të përfitojë falje. Ajo gjithashtu kërkoi që gjyqtarët, avokatët dhe prokurorët të mos përfshihen në Komisionin për Falje, për të shmangur konfliktet e interesit.
“Rreth përbërjes së Komisionit: në komision kanë marrë pjesë rregullisht gjyqtarë, prokurorë dhe avokatë. Unë, duke biseduar me kolegët, kam theksuar se, pavarësisht njohurive dhe përvojës së tyre, kam rezervë për përfshirjen e tyre, pasi mund të lindë konflikt interesi, qoftë direkt apo indirekt. Për këtë arsye, nuk do të dëshiroja që këto persona të jenë pjesë e komisionit.”, – deklaroi presidentja e RMV-së, Gordana Siljanovska Davkova.
