Programi Studimor i Psikologjisë në Fakultetin Filozofik të Universitetit të Tetovës në bashkëpunim me programin e Psikologjisë në Fakultetin Filozofik të Universitetit “Shën Kirili dhe Metodi” në Shkup, me rastin e 105-vjetorit të themelimit të Fakultetit Filozofik të Universitetit “Shën Kirili dhe Metodi” – Shkup, këtë muaji i prezantuan gjetjet mbi shëndetin seksual dhe mirëqenien e të rinjve, të bazuara në të dhënat e Studimit për Sjelljet e Lidhura me Shëndetin te Fëmijët e Moshës Shkollore (HBSC) 2021/2022 në Republikën e Maqedonisë së Veriut.
Në hapje të ngjarjes, të pranishmëve iu drejtua me fjalë përshëndetëse edhe dekani i Fakultetit Filozofik të Universitetit të Tetovës Prof. Dr. Kushtrim Ahmeti, i cili theksoi rëndësinë e bashkëpunimit akademik ndëruniversitar dhe kontributin e studimeve shkencore në avancimin e shëndetit dhe mirëqenies së të rinjve. Në këtë aktivitet prej Universitetit të Tetovës morën pjesë Prorektori për Arsim Prof. Dr. Ibrahim Neziri, Prof. Dr. Sheruze Osmani-Ballazhi, Prof. Dr. Luljeta Bexheti, Prof. Dr. Fitore Bajrami, Mr. Sc. Behare Kasami, Mr. Sc. Manushaqe Abdiu dhe studentët e programit studimor Psikologji.
Gjatë prezantimit të mbajtur nga Prof. Dr. Sheruze Osmani – Ballazhi dhe Lina Qostarova –Unkovska, u theksua se sjelljet e të rinjve, përfshirë aspektet që lidhen me shëndetin seksual, ndikohen nga normat shoqërore dhe rolet gjinore. Në këtë kontekst, u nënvizua nevoja për qasje të bazuara në prova shkencore dhe për ndërhyrje edukative të mirëstrukturuara. Pjesëmarrësit në këtë organizim diskutuan për rëndësinë e gjetjeve të studimit dhe për hartimin e politikave dhe programeve që synojnë përmirësimin e shëndetit dhe mirëqenies së fëmijëve dhe adoleshentëve.
