Nënpunës policorë nga SPB Shtip, DPB Koçan, në bashkëpunim me Departamentin e Policisë Kriminale dhe në koordinim me Prokurorinë Themelore Publike Koçan, sot ndërmorën aktivitete në disa lokacione nëpër vend, me ç’rast u arrestuan tetë persona. DPB Koçan ka paraqitur kallëzime penale në Prokurorinë Themelore Publike Koçan ndaj 11 personave për vepra penale korruptive të lidhura me funksionimin e klubit “Puls”, nga të cilët tetë u arrestuan sot, ndërsa tre të tjerë ishin siguruar më herët dhe ndaj tyre tashmë janë caktuar masa.
Siç kumtoi MPB-ja, dy kontrollorë tatimorë, D.P. dhe D.D., nga Shërbimi i Kontrollit Tatimor pranë Inspektoratit Rajonal Tatimor në Drejtorinë Rajonale Shtip, janë kallëzuar se e kanë keqpërdorur pozitën dhe autorizimet e tyre zyrtare, si dhe qasjen në të dhëna dhe informacione për kontrolle të pa paralajmëruara në subjekte juridike — tatimpagues, dhe me qëllim të përfitimit të kundërligjshëm financiar dhe dhuratave, i kanë zbuluar informatat dhe e kanë paralajmëruar personin përgjegjës në klub për kontrollet. Ata janë kallëzuar për Marrje ryshfeti sipas nenit 357 të Kodit Penal, ndërsa personi përgjegjës M.J. — djali i pronarit të vërtetë të “Puls” — është kallëzuar për Dhënie ryshfeti sipas nenit 358 të Kodit Penal.
Gjashtë persona të tjerë, D.Ç., A.Ç., A.K., A.Ç., N.T. dhe A.K., inspektorë tatimorë dhe udhëheqës nga drejtoritë rajonale të Drejtorisë së të Ardhurave Publike në Shtip dhe Strumicë, u kanë mundësuar subjekteve juridike “MMMM Kafe” dhe “Puls” të shmangin kontrollet tatimore dhe të punojnë pa fiskalizim të rregullt, me ç’rast dyshohen se kanë kryer veprën penale Keqpërdorim i pozitës dhe autorizimit zyrtar në pajtim me nenin 353 të Kodit Penal.
Pronari i “Puls”, D.J., është kallëzuar për Falsifikim të dokumentit sipas nenit 378 të Kodit Penal, pasi për një periudhë të gjatë kohe, me vetëdije dhe me qëllim, gjatë kontrolleve nga Drejtoria e të Ardhurave Publike ka paraqitur pajisje fiskale të ndryshuara me raporte kontrolli fiskal me të dhëna të pavërteta, të cilat i ka përdorur si të vërteta, me qëllim shmangien e gjobave financiare dhe mbylljen e objektit.
E dyshuar është edhe një inspektore nga Inspektorati Shtetëror i Tregut, V.K., e cila gjithashtu është përfshirë në procedurën paraprake dhe për të cilën tani janë siguruar dëshmi shtesë për veprën penale Zbulim i sekretit zyrtar sipas nenit 360 të Kodit Penal, për shkak të zbulimit të informacioneve për kontrolle të pa paralajmëruara.
