Presidenti i Kolumbisë, Gustavo Petro, ka deklaruar se është i gatshëm të “marrë sërish armët” nëse do të jetë e nevojshme për të mbrojtur sovranitetin e vendit nga kërcënimet e presidentit amerikan, Donald Trump.
Në një postim të publikuar herët në mëngjes në platformën X, Petro – ish-luftëtar gueril i Lëvizjes M-19 – ka thënë se megjithëse ka premtuar të mos prekë më armë pas marrëveshjes së paqes të vitit 1989, do ta bëjë këtë për hir të atdheut.
“Edhe pse nuk kam qenë ushtar, e njoh luftën dhe klandestinitetin. Jam betuar të mos prek më armë që nga marrëveshja e paqes e vitit 1989, por për hir të atdheut do t’i marr sërish armët që nuk i dua,” ka shkruar Petro, raporton CNN, përcjell Insajderi.
Deklarata e tij vjen pas komenteve të Trumpit, i cili të dielën u tha gazetarëve se Kolumbia, ashtu si Venezuela, është “shumë e sëmurë”. Ai e cilësoi Petron si një “njeri të sëmurë që i pëlqen të prodhojë kokainë dhe ta shesë në Shtetet e Bashkuara”, duke shtuar se kjo, sipas tij, nuk do të zgjasë më shumë.
Petro i ka quajtur deklaratat e Trumpit si “kërcënim të paligjshëm”, duke theksuar arritjet e qeverisë së tij në luftën kundër trafikimit të drogës. Ai ka shtuar se forcat e armatosura kolumbiane kanë kryer bombardime duke respektuar normat e së drejtës humanitare, por ka paralajmëruar se grupet kriminale po shfrytëzojnë dhe rekrutojnë të mitur për mbrojtje.
“Nëse bombardoni qoftë edhe një nga këto grupe pa inteligjencë të mjaftueshme, do të vritni shumë fëmijë. Nëse bombardoni fshatarët, ata do të shndërrohen në mijëra guerilë në male. Dhe nëse arrestoni presidentin që një pjesë e madhe e popullit tim e do dhe e respekton, do ta zgjoni jaguarin e popullit,” ka paralajmëruar Petro.
