Policia ka privuar nga liria një dhunues nga Radovishi, i cili në rrjetin social “TikTok” transmetoi drejtpërdrejt rrahjen e gruas. Nga Ministria e Punëve të Brendshme konfirmuan se personi është dërguar menjëherë në stacionin policor, pasi videoja u shpërnda në publik. Në incizim duket se dhunuesi ofendon dhe rrah gruan, për të cilën thuhet se është shtatzënë. Përveç kësaj videoje, në rrjetet sociale qarkullojnë edhe të tjera nga i njëjti dhunues, ku ai keqtrajton gruan, ndërsa ndaj tij tashmë është duke u zhvilluar procedurë gjyqësore aktive për shkak të dhunës ndaj një viktime tjetër. Sipas ligjit për veprën penale “Dhunë familjare”, është i patjetërsueshëm propozim për ndjekje penale, përkatësisht viktima duhet ta denoncojë dhunuesin në polici që të fillohet procedura ndaj tij, por në rastin konkret, gruaja ka refuzuar ndjekjen penale dhe ka deklaruar se videoja është e vjetër, edhe pse në video ku dhunuesi e rrah qëndron data 22 mars. /Alsat.mk
Lajmet e fundit
