Korrespondenca detajon se si copëra të shenjta të mbulesës së Qabes arritën te Epstein përmes një biznesmeneje të lidhur me Emiratet e Bashkuara Arabe.
Nga Elis Gjevori
Dosjet e sapo-publikuara të Epstein-it përfshijnë email-e që detajojnë një dërgesë të diskutueshme të një cope të shenjtë nga Qabja në Mekë drejt Shteteve të Bashkuara, e organizuar përmes kontakteve të lidhura me Emiratet e Bashkuara Arabe dhe e dorëzuar te pedofili i dënuar Jeffrey Epstein.
Korrespondenca, e datuar shkurt dhe mars 2017, tregon se biznesmenia emirate Aziza Al-Ahmadi ka bashkëpunuar me një burrë të quajtur Abdullah Al-Maari për të organizuar dërgesën e tre copave të lidhura me Kiswan – mbulesën e zezë të qëndisur me ar që mbulon Qaben, në qendër të vendit më të shenjtë të Islamit në Arabinë Saudite.
Kiswaja ka një domethënie të thellë fetare për myslimanët në mbarë botën. Çdo vit, punëtorët e heqin mbulesën dhe e mbulojnë Qaben me një të re, ndërsa pjesë nga Kiswaja e mëparshme trajtohen si relike të paçmueshme.
Email-et në dosje tregojnë se sendet janë dërguar me transport ajror nga Arabia Saudite në Florida përmes British Airways, me koordinim që përfshinte fatura, procedura doganore dhe dorëzim brenda Shteteve të Bashkuara.
Mesazhet përshkruajnë tre copa të veçanta: një nga brendësia e Qabes, një nga mbulesa e jashtme që ishte përdorur, dhe një e tretë e prodhuar nga i njëjti material, por që nuk ishte përdorur. Korrespondenca e përshkruan copën e papërdorur si një mënyrë për ta klasifikuar dërgesën nën kategorinë “vepra arti”.
Dërgesa mbërriti në shtëpinë e Epstein-it në mars 2017, shumë kohë pasi ai kishte kryer dënimin me burg dhe ishte regjistruar si shkelës seksual.
Në një email, Al-Ahmadi thekson rëndësinë fetare të copës, duke iu drejtuar drejtpërdrejt Epstein-it:
“Pjesa e zezë është prekur nga të paktën 10 milionë myslimanë të besimeve të ndryshme, sunitë, shiitë dhe të tjerë.”
“Ata rrotullohen rreth Qabes shtatë herë dhe më pas secili përpiqet sa mundet ta prekë atë, duke lënë mbi këtë copë lutjet, dëshirat, lotët dhe shpresat e tyre, me shpresën që më pas lutjet e tyre të pranohen,” shton ajo.
Korrespondenca nuk shpjegon se si Al-Ahmadi u njoh me Epstein-in apo pse këto copa iu dërguan atij.
Në një seri tjetër email-esh, Al-Ahmadi po kontrollon gjendjen e Epstein-it pasi uragani Irma goditi Karaibet në shtator 2017, duke shkaktuar dëme të mëdha në ishullin e tij privat.
Për disa ditë radhazi, Al-Ahmadi kontaktoi vazhdimisht sekretaren e Epstein-it për të pyetur për gjendjen e tij në ishull.
“Të gjithë janë të sigurt dhe kjo është më e rëndësishmja… disa struktura janë shkatërruar… pemët janë zhdukur… pavijonet e dokut janë zhdukur… rrugët janë të pakalueshme… ka dëme të tjera të jashtme, por brenda gjithçka është në rregull… është rrëmujë, por gjithçka mund të rindërtohet! faleminderit që pyete,” shkruan sekretarja.
Al-Ahmadi përgjigjet: “Premtoj të dërgoj një tendë të re ;)”.
Email-et nuk tregojnë nëse Al-Ahmadi e ka vizituar ndonjëherë ishullin e Epstein-it apo nëse e ka kuptuar shtrirjen e plotë të asaj që ndodhte atje.
Në një mesazh tjetër, ndihmësja shumëvjeçare e Epstein-it, Lesley Groff, i dërgoi Al-Ahmadit një komplet për testim ADN-je; nuk është e qartë për çfarë arsyeje.
Epstein rrallë komunikonte drejtpërdrejt me Al-Ahmadin në këtë korrespondencë. Në një email, ajo e pyet Groff-in:
“A mund të kaloj sot nga shtëpia e Jeffrey-t para se të largohem nga Nju Jorku, për t’i thënë lamtumirë dhe urime për ditëlindje? Më duhen vetëm 15 minuta.”
Veçmas, një memorandum i FBI-së i publikuar të premten në mbrëmje thotë se Epstein ka bashkëpunuar me inteligjencën amerikane dhe izraelite.
“Epstein ishte i afërt me ish-kryeministrin e Izraelit, Ehud Barak, dhe u trajnua si spiun nën drejtimin e tij,” shton memorandumi.
