Të reshurat e shiut në Pollog kanë bërë që lumenjtë të futen në shtëpi dhe bodrume. Por për pastrimin e tyre përgjegjësia hudhet nga një institucion tek një tjetër. Ministri i Ekologjisë, Muhamet Hoxha, thotë se obligimi i komunës është pastrimi i lumenjve, ndërsa ministria duhet të ndajë vetëm bllok donacione.
“Pastrimi edhe mirëmbajtja e lumenjve është në kuadër të kompetencave që i kanë komunat. Ministria e Ambientit Jetësor edhe Planifikimit Hapësinor siguron mjete në bazë të programeve të cilët i kemi në bashkëpunim edhe me kërkesat komunale”, tha Muhamet Hoxha, ministër i Mjedisit Jetësor dhe Planifikimit Hapësinor.
Por nga Komuna e Gostivarit thonë se edhe në bazë të ligjit lumenjtë janë në kompetencë të komunës së Gostivarit në vendet e banueshme edhe rurale, ndërsa për ata duhet të kujdeset Drejtoria për Menaxhimin e Ujërave, dhe pikërisht në ato pjesë ku nuk janë në kompetencë të komunave, lumenjtë janë të papastruar dhe shkaktojnë vërshime.
“Mirëmbajtjen, pastrimin dhe rregullimin e koritave të lumejve, projëve dhe të vijave që sjellin ujë dhe që kalojnë në qytet i mirëmban komuna, por jashtë vendeve urbane, jashtë territoreve të banuara, ku ka objekte banimi, përgjegjësinë e mban ndërmarrja aksionare për menaxhim me ujrat. Vërshimet zakonisht vinë nga periferia, ajo nuk është e mirëmbajtur, kjo ndërmarrja ka probleme serioze, nuk ka makineri, nuk ka mjete, janë me një kolaps, dhe meqenëse periferia nuk pastrohet ndodh që edhe të vijnë në qytet. Mirë, por pjesa e qytetit, sidomos në Gostivar, vegjetacionin e pastrojmë dy herë në vit”, theksoi Zudi Xhelili – Komuna e Gostivarit.
Edhe nga Komuna e Zhelinës, ditë më parë, bëjnë apel për marrje të masave pasi që çdo herë kur kemi të reshura të shtuara, rreth 50 shtëpi edhe toka në këtë komunë janë në rrezik.
“Masa duhet të merren jo vetëm nga komuna, por edhe nga institucionet më të larta mbi lumin Vardar. Nga viti 2010, kur rritet niveli në lumin Vardar, kemi dëme këtu në këtë pjesë, tash duhet të marrim masa që mos përsëritet kjo skenë”, u shpreh Suad Alili – drejtor I NPK-së Zhelinë
Problem në qytete paraqiten edhe lumenjtë e vegjël, që shpesh mbushen nga të reshurat në bjeshkë, siç është edhe rasti i lumit në fshatin Poroj, i cili pas të reshurave shkakton dëme të mëdha si në fshat, poashtu edhe në të mbjellat.
