Në ish-shkollën fillore në Kuçkovë të Shkupit, sërish do të dëgjohet zhurma e fëmijëve, por jo nga nxënësit, por nga fëmijët që janë shëruar nga kanceri. Sot u promovua zyrtarisht projekti “Historia vazhdon” për ndërtimin e një Qendre Rajonale për rehabilitimin dhe risocializimin e fëmijëve të shëruar nga sëmundjet malinje, përmes rinovimit dhe përshtatjes së ish-shkollës fillore në Kuçkovë. Objekti së shpejti do t’i hapë dyert për qëndrimin e luftëtarëve të rinj, falë Ministrisë së Vetëqeverisjes Lokale, mbështetjes financiare nga Qeveria e Zvicrës dhe pjesëmarrjes së Komunës së Gjorçe Petrovit, si pjesë e projektit “Zhvillim rajonal i qëndrueshëm dhe gjithëpërfshirës” – faza 2.
Ministri i Vetëqeverisjes Lokale, Zllatko Perinski, kryetari i Komunës së Gjorçe Petrovit, Aleksandar Stojkoski, dhe ushtruesja e detyrës së drejtoreshës së Qendrës për Zhvillimin e Rajonit Planor të Shkupit, Rozeta Arsovska, vizituan Qendrën në të cilën është në fazën përfundimtare rregullimi i hapësirave dhe sistemimi hortikulturor i oborrit.
Objekti me një sipërfaqe prej 650 m² ka kapacitet për qëndrimin e 20 fëmijëve me shoqërimin e një prindi, në hapësira të pajisura plotësisht dhe me klasa për arsim online, për ushtrime fizikale, një dhomë për punëtori psiko-sociale, si dhe dhoma për lojë dhe një “dhomë e qetë” për rehabilitim.
“Kjo Qendër do të thotë shumë shpresë, mundësi të reja, perspektiva të reja për të gjithë ata heronj të vegjël që kanë fituar betejën me kancerin. Projekti u frymëzua nga të gjithë ata për shkak të nevojës për ndihmë gjatë periudhës së trajtimit dhe më pas, dhe qëllimi është t’u ofrojmë mbështetje maksimale psiko-sociale në procesin e resocializimit dhe riintegrimit të tyre në shoqëri, pas qëndrimit të gjatë në institucionet spitalore”, theksoi kryetari i komunës, Stojkoski, duke falënderuar të gjithë ata që kontribuuan në realizimin e projektit.
“Nuk bëhet fjalë vetëm për një objekt të zakonshëm dhe një shkollë të vjetër, bëhet fjalë për një monument që në të ardhmen do të na kujtojë se nëse diçka dëshirohet me të vërtetë, mund të realizohet dhe se vetëm historia e ruajtur është karta jonë e identitetit, ndërsa investimi në arsim dhe edukimin e fëmijëve është rruga që çon drejt një sistemi të vërtetë të vlerave njerëzore”, tha Marija Vuk, kryetare e OJQ SANО, një nga iniciatorët e projektit.
Ky është një nga dhjetë projektet që Ministria e Vetëqeverisjes Lokale po realizon me mbështetje financiare nga Qeveria e Zvicrës në kuadër të projektit “Zhvillim rajonal i qëndrueshëm dhe gjithëpërfshirës” – faza 2, me një vlerë totale prej 23.574.074,00 denarësh, nga të cilat 8.435.000,00 denarë janë siguruar nga Agjencia Zvicerane për Zhvillim dhe Bashkëpunim, 10.380.998,00 denarë nga Ministria, ndërsa Komuna e Gjorçe Petrovit kontribuon me 4.758.076,00 denarë.
“Kjo është një ndihmë e vogël nga ana jonë për mbështetjen e luftëtarëve të rinj dhe sinqerisht shpresoj që në të ardhmen në këtë objekt të shohim shumë buzëqeshje, fëmijët të risocializohen dhe vërtet të ndërtojnë rrugën e tyre drejt një të ardhmeje më të mirë. Shpresoj se si Ministri, dhe jam i bindur se edhe si Qeveri, do të mund të jemi dëshmitarë të realizimit të shumë projekteve të tilla që do të sjellin një të nesërme më të mirë për të gjithë qytetarët”, deklaroi ministri Perinski.
Rikonstruksioni dhe përshtatja e ish-shkollës erdhi si një nga kërkesat e qytetarëve përmes Forumeve Rajonale të Komuniteteve, të organizuara nga Qendra për Zhvillimin e Rajonit Planor të Shkupit (QZHRPSH).
“Jemi krenarë për projektin që doli nga forumet rajonale të organizuara nga qendra jonë, i cili do t’u mundësojë fëmijëve mbrojtje shëndetësore, sociale dhe rehabilitim, si dhe edukim dhe ndihmë për t’u rikthyer në sistemin arsimor në baza të barabarta me bashkëmoshatarët e tyre”, deklaroi ushtruesja e detyrës drejtoreshë e QZHRPSH, Arsovska.
