Për herë të parë që nga nisja e trazirave, autoritetet iraniane kanë pranuar shifrën e lartë të viktimave gjatë shtypjes së dhunshme të protestave që kanë përfshirë vendin javët e fundit.
Një zyrtar iranian ka konfirmuar të martën se rreth 2,000 persona, duke përfshirë këtu edhe pjesëtarë të forcave të sigurisë, kanë humbur jetën gjatë dy javëve të protestave intensive. Ky është konfirmimi i parë zyrtar që pranon përmasat e përgjakshme të përplasjeve.
Në një prononcim për agjencinë e lajmeve Reuters, ky zyrtar, i cili ka folur në kushte anonimiteti, ka tentuar të fajësojë grupe të jashtme për gjakderdhjen.
“Terroristët qëndrojnë pas vdekjeve të protestuesve dhe personelit të sigurisë,” ka deklaruar ai, pa dhënë një ndarje të saktë se sa prej të vrarëve ishin civilë dhe sa ishin pjesëtarë të regjimit.
Irani është përfshirë nga një valë pakënaqësie mbarëkombëtare, e cila është përballur me një reagim të ashpër dhe të armatosur nga forcat e sigurisë. Deri më tani, Teherani zyrtar kishte hezituar të jepte shifra kaq të larta.
Trazirat, të cilat u nxitën nga kushtet e rënda ekonomike, po vlerësohen si sfida më e madhe e brendshme për udhëheqësit klerikë të Iranit në të paktën tre vitet e fundit. Kjo krizë po ndodh në një kohë kur presioni ndërkombëtar është rritur ndjeshëm, veçanërisht pas sulmeve të vitit të kaluar nga Izraeli dhe SHBA-të.
Mbrëmjen e së hënës, Presidenti i SHBA-ve, Donald Trump, njoftoi vendosjen e tarifave prej 25% mbi importet e produkteve nga çdo vend që bën biznes me Iranin – një eksportues i madh i naftës. Për më tepër, Trump nuk ka përjashtuar as opsionin ushtarak si ndëshkim për shtypjen e dhunshme të protestave.
“Jemi të përgatitur dhe me armë të mbushura (locked and loaded),” kishte deklaruar Trump më herët gjatë këtij muaji.
Ndërsa Teherani zyrtar ende nuk ka reaguar publikisht ndaj tarifave të reja amerikane, Kina ka dalë menjëherë me kritika të ashpra. Irani, i cili tashmë ndodhet nën sanksione të rënda, pjesën më të madhe të naftës e eksporton në Kinë, ndërsa partnerë të tjerë kryesorë tregtarë mbeten Turqia, Iraku, Emiratet e Bashkuara Arabe dhe India.
