Pas takimit me presidentin e Ukrainës Volodymir Zelensky dhe liderët evropian, kreu i Shtëpisë së Bardhë Donald Trump ka deklaruar se ka nisur bisedimet për një takim tre palësh.
“Në përfundim të takimeve, e thirra Presidentin Putin dhe fillova përgatitjet për një takim, në një vend që do të përcaktohet më vonë, midis Presidentit Putin dhe Presidentit Zelensky. Pas këtij takimi, do të kemi një Trilat, ku do të jenë të dy Presidentët, plus unë. Përsëri, ky ishte një hap shumë i mirë dhe i hershëm për një luftë që ka vazhduar për gati katër vjet. Zëvendëspresidenti JD Vance, Sekretari i Shtetit Marco Rubio dhe i Dërguari Special Steve Witkoff po koordinohen me Rusinë dhe Ukrainën. Faleminderit për vëmendjen tuaj ndaj kësaj çështjeje”, tha Trump.
Ai po ashtu ka theksuar se diskutimet me liderët europianë ishin efektive, ndërsa fokusi ishte te siguria e Ukrainës.
“Gjatë takimit diskutuam Garancitë e Sigurisë për Ukrainën, garanci të cilat do të ofroheshin nga vendet e ndryshme evropiane, në koordinim me Shtetet e Bashkuara të Amerikës. Të gjithë janë shumë të lumtur për mundësinë e PAQES për Rusinë dhe Ukrainën”, deklaroi Trump.
Në një konferencë për mediat pas diskurtimeve, kancelari gjerman Fridrich Merz u shpreh se takimi mes Putin dhe Zelensky pritet te ndodhë shumë shpejt.
“Presidenti rus, Vladimir Putin, ka rënë dakord të takohet me Presidentin ukrainas Volodymyr Zelenski brenda dy javëve të ardhshme gjatë një telefonate me Presidentin amerikan Donald Trump”, tha Merz.
Ndërkohë Macron tha se formati i bisedimeve pritet të jetë i gjerë, duke përfshirë fillimisht një takim dypalësh mes dy liderëve, më pas një takim trepalësh ku do të jetë i pranishëm edhe Donald Trump, si dhe një fazë të fundit shumëpalëshe me përfaqësuesit e vendeve europiane.
Sipas shefit të Elizesë, samiti mund të mbahet në një vend neutral, ku opsioni më i mundshëm mbetet Gjeneva në Zvicër, edhe pse në tavolinë është edhe alternativa e Stambollit, ku më herët janë zhvilluar bisedime dypalëshe mes palëve.
