Evakuimi i shtetasve të Maqedonisë së Veriut që kërkuan kthim nga vendet e Lindjes së Mesme tashmë ka përfunduar. Nga Ministria e Punëve të Jashtme bëjnë të ditur se procesi është realizuar përmes pesë fluturimeve të organizuara nga zonat e konfliktit, me ç‘rast në vend janë kthyer gjithsej 605 shtetas, ndërsa vetëm mbrëmë mbi 100 qytetarë arritën në Shkup.
“Me fluturimin e fundit, të pestë që ateroi në Aeroportin Ndërkombëtar të Shkupit, u evakuuan gjithsej 147 persona, nga të cilët 119 ishin shtetas të Maqedonisë së Veriut dhe 28 ishin të huaj”, njoftojnë nga Ministria e Punëve të Jashtme.
Ministria e Punëve të Jashtme gjithashtu njoftoi se numri emergjent SOS dhe kontaktet e përfaqësive diplomatike-konsullore do të mbeten aktive për çdo qytetar që mund të ketë nevojë për ndihmë. Evakuimi i shtetasve u ndërmor pas luftimeve në vendet e Lindjes së Mesme, ku tensionet dhe përshkallëzimi i konfliktit krijuan rrezik të drejtpërdrejtë për qytetarët që ndodheshin atje. Procesi i evakuimit nisi menjëherë pas thirrjeve të autoriteteve për largim urgjent dhe regjistrimit të shtetasve që kërkuan ndihmë për kthim, me qëllim garantimin e sigurisë së tyre dhe rikthimin e organizuar në vend.
