Partia Demokratike Evropiane e drejtuar nga Arianit Hoxha ka gjasa t’i bashkohet Bashkimit Demokratik për Integrim, pasi këta të fundit u bënë thirrje të gjitha partive politike t’i bashkëngjiten BDI-së dhe të bëhen pjesë e formacionit tonë politik. Të pyetur nga TV21, nga partia e Hoxhës thanë se NË parim është për t’u përshëndetur një iniciativë e tillë dhe se do ta shqyrtojnë në organet e tyre partiake.
“Në kuadër të partisë kemi mbledhje të Kuvendit Qendror nesër dhe do hapet si debat. Absolutisht që do shqyrtohet dhe nëse Kuvendi i PDE-se jep dritë të gjelbër atëherë do ulemi me BDI për të definuar detajet e mëtutjeshme” thanë për TV21 nga Partia Demokratike Evropiane.
Përndryshe mbrëmë pas mbledhjes së Këshillit të Përgjithshëm, BDI u bëri thirrje të gjitha partive politike në vend që janë të përafërta me vizionin e BDI-së, si dhe kapaciteteve intelektuale, shoqërore dhe profesionale, që t’i bashkëngjiten BDI-së dhe të bëhen pjesë e formacionit të tyre politik.
“BDI mbetet e hapur për inkorporimin dhe absorbimin e gjithë potencialit intelektual dhe politik në vend, me qëllim avancimin e politikave dhe vizionit që janë në interes të shtetit dhe të të gjithë qytetarëve pa dallim. Prandaj, kjo thirrje u drejtohet të gjitha subjekteve politike, asociacioneve shoqërore, intelektuale dhe profesionale, që të bëhen pjesë e Bashkimit Demokratik për Integrim dhe e vizionit tonë të përbashkët për një shtet stabil, demokratik dhe të zhvilluar”, shkruhet në komunikatën e integristëve.
Mbetet për t’u parë se si do të veprojnë partitë e tjera që aktualisht janë në koalicionin AKI, si ASH-ja e drejtuar nga Arben Taravari dhe Lëvizja “Populli” e Skënder Rexhepit Zejdit. Përgjigjet e tyre do t’i sjellim gjatë ditës në tv21.tv.
