Papa Françesku bëri thirrje për një armëpushim të menjëhershëm në Gazë dhe lirimin e të gjitha pengjeve izraelite gjatë fjalimit të së dielës me rastin e Pashkëve, që shënoi ditën më të rëndësishme në kalendarin e krishterë, ndërsa ati i shenjtë shprehu keqardhje për vuajtjet e shkaktuara nga luftërat.
Papa kryesoi meshën e mbajtur në Sheshin e Shën Pjetrit nga ballkoni qendror i Bazilikës duke mbajtur fjalimin tradicional “Urbi et Orbi” (drejtuar qytetit dhe botës).
Papa 87-vjeçar nuk ka qenë në gjendje të mirë shëndetësore gjatë javëve të fundit, duke i kufizuar daljet publike dhe anuluar disa ceremonitë si ajo e së ‘Premtes së Mirë’ dhe evente të tjera.
Megjithatë, ati i shenjtë mori pjesë në ngjarje të tjera të ‘Javës së Shenjtë’ që i paraprijnë Pashkës dhe dukej mjaft mirë të dielën. Pashkët shënojnë ditën për të cilën besimtarët besojnë se Krishti u ngjall nga vdekja.
Pas shërbesës, Papa u ngjit në makinën e zbuluar për të përshëndetur turmat në shesh dhe rrugën që lidh bazilikën me lumin Tiber. Vatikani tha se rreth 60,000 njerëz morën pjesë në ceremoninë e lutjeve.
Papa Françesku vazhdimisht ka shprehur keqardhje për vdekjet dhe shkatërrimet nga lufta në Gazë. Ai i përsëriti thirrjet për armëpushim gjatë ceremonisë të dielën.
“Unë bëj thirrje edhe një herë që të sigurohet qasja e ndihmave humanitare në Gazë, bëj thirrje përsëri për lirimin e menjëhershëm të pengjeve të marra më 7 tetor dhe për një armëpushim të menjëhershëm në Rripin e Gazës”, tha ai gjatë fjalimit ‘Urbi et Orbi’.
“Sa vuajtje shohim në sytë e fëmijëve, fëmijët kanë harruar të buzëqeshin në ato zona lufte. Me sytë e tyre, fëmijët na pyesin: Pse? Pse gjithë kjo vdekje? Pse gjithë ky shkatërrim? Lufta është gjithmonë një absurditet dhe një humbje”, tha ati i shenjtë.
Mesazhi i Papës për Pashkët përqendrohet tradicionalisht tek çështjet botërore. Ai foli për Ukrainën, Sirinë, Libanin, Armeninë, Azerbajxhanin, Haitin, Mianmarin, Sudanin, rajonet Sahel dhe Bririn e Afrikës, Kongon dhe Mozambikun.
Vitin e kaluar Papa i kërkoi kardinalit italian Matteo Zuppi që të ndërmjetësonte riatdhesimin nga Rusia dhe territoreve të pushtuara të fëmijëve ukrainas. Në fjalimin e Pashkëve Papa bëri thirrje për ‘një shkëmbim të përgjithshëm të të gjithë të burgosurve mes Rusisë dhe Ukrainës’.
Papa e dënoi trafikimin e qenieve njerëzore dhe u lut për “një rrugë shprese” për ata që vuajnë nga dhuna, uria dhe efektet e ndryshimeve klimatike, ndërsa shprehu ngushëllime për “viktimat e terrorizmit në të gjitha format e tij”./VOA
