Pas reagimeve të shumta në opinion dhe debatit të hapur në komunitetin akademik, ministrja e Arsimit, Vesna Janevska, la të kuptohet se propozim ligji për arsimin e lartë mund të pësojë ndryshime gjatë fazës së konsultimeve publike.
Ajo kujtoi se draft ligji tashmë i publikuar në ENER do të qëndrojë aty brenda afatit ligjor, duke theksuar se çdo koment i argumentuar do të shqyrtohet.
“Ligji është tashmë në ENER, do të qëndrojë aty për një periudhë më të gjatë, në fakt brenda afatit ligjor, dhe të gjitha komentet që do të paraqiten zyrtarisht do të merren në konsideratë. Çdo gjë që është e pranueshme për ligjin do të pranohet, atë që ne e konsiderojmë të papranueshme do ta diskutojmë edhe një herë dhe në fund do të arrijmë në një zgjidhje”, tha Vesna Janevska, ministre e Arsimit.
Deklaratat e saj vijnë pasi në opinion u problematizuan komentet e bëra në një debat televiziv ku ministrja Janevska foli për ekzistimin e programeve studimore me 3 deri në 5 studentë, duke i cilësuar si të paqëndrueshme në aspektin e funksionimit. Reagimi i një ditë më parë erdhi nga programi Studime Ndërkombëtare dhe Ndërkulturore pranë Fakultetit Filozofik në Universitetin “Shën Kirili dhe Metodi” në Shkup. Në një njoftim publik, ata theksuan se programi funksionon me kuotë prej rreth 25 studentësh në vit dhe se numri i studentëve është në përputhje me kapacitetet dhe modelin ndërdisiplinor të studimit.
Propozim ligji i ri u kritikua edhe nga Forumi për Ndryshime në Arsim. Sipas Forumit, Qeveria po kërkon të marrë në dorë universitetet, duke kontrolluar statutet e tyre, gjë që e quan kundër Kushtetutës.
Gjithashtu, Forumi akuzon se ligji vendos kritere të forta për profesorët e rinj, por i fal ata që janë tashmë në punë. Madje ata thonë se ky ligj përveç se po bëhet për të mbrojtur profesorët po i hap rrugë edhe nepotizmit, duke dëmtuar rëndë cilësinë në fakultete./ Alsat.mk
