Pas kaosit që ndodhi në Drejtorinë e të Ardhurave Publike, për shkak se nuk kishte person të autorizuar që të nënshkruajë dokumentet me të cilat konfirmohet se qytetarët nuk kanë borxh ndaj shtetit, Qeveria dhe Drejtoria e të Ardhurave Publike e konfirmuan këtë problematikë.
“Në redaksinë tonë arritën ankesa nga qytetarët se nuk kishte kush t’ua nënshkruajë raportet se nuk kanë borxh ndaj shtetit, pas arrestimit të drejtueses së drejtorisësë së qytetit”, raporton gazetari i Alsat, Angell Dimovski.
Nga DAP theksuan se javën e kaluar janë caktuar persona të autorizuar për nënshkrim, si dhe se është vendosur organizim i brendshëm për kontroll dhe miratim të akteve tatimore dhe tatimore-administrative të përgatitura. Shtojnë se tatimpaguesit mund t’i marrin vërtetimet që nga sot.
“Për kërkesat për lëshim të vërtetimeve për tatimet e paguara të dorëzuara javën e kaluar, aktet tashmë janë përgatitur dhe nënshkruar dhe tatimpaguesit do të mund t’i marrin nga sot në sportelet e Drejtorisë rajonale. Për kërkesat për të cilat vërtetimet janë përgatitur në periudhën e mëhershme, aktet e përgatitura po rishikohen me nënshkrues të ri dhe do të lëshohen nga e mërkura”, thonë nga DAP.
Drejtoria e të Ardhurave Publike thotë se afati ligjor për lëshimin e vërtetimit është 15 ditë nga dorëzimi i kërkesës. Ndryshe, siç publikoi Alsat, burimet tona thonë se edhe pse drejtoresha kishte autorizuar persona të tjerë në drejtori që të nënshkruajnë dokumente tatimore në emër të saj, ata, duke u frikësuar se më vonë mund të kenë pasoja juridike, kanë refuzuar ta bëjnë këtë./ Alsat.mk
